اشترك
Buy Neuth France products

افرحي بحملك رغم تقدمك في السن علشان الاسباب دي

0

بسبب ارتفاع سن الجواز عند كتير من الشباب والشابات لاسباب مختلفة وبسبب حالات تأخر الانجاب عند نسبة مش قليلة من المتجوزين وكمان بسبب زيادة نسب الطلاق والرغبة في الارتباط بشريك جديد عند كتير من الرجال والسيدات فموضوع  الانجاب في سن متقدمة شوية بقي حالة منتشرة عند نسبة مش قليلة من الرجال والسيدات،وبرغم ان تقدم سن الانجاب له بعض المخاطر المحتملة علي صحة الام والطفل الا ان برضه له كتير من المميزات اللي بتستمتع بيها الام المتقدمة في السن ومش كل الامهات في السن الصغير بيقدروا يستمتعوا بيها.

مميزات الانجاب في سن متقدم:
1-بتكوني حققتي كتير من طموحاتك:
من اكبر مميزات الانجاب في سن متقدم شوية انك بتكوني قدرتي تحققي كتير من طموحاتك علي مستوي الدراسة والشغل والصداقات واكيد بتكوني وصلتي لمركز كويس في شغلك وكمان قضيتي وقت كتير من حياتك في الخروج والتنزه مع صحباتك بعكس الام الصغيرة في السن اللي الانجاب في سن صغير بيخليها تتعطل شوية في شغلها في كتير من الاوقات وغالبا بيأخر خطوة انها تترقي او تاخد علاوة افضل وبيخليها مرتبطة بطفلها معظم الوقت بشكل ميخليهاش طبعا تقدر تشوف صحباتها وتخرج وقت ماهي عايزة وهي في سن صغير.

2-بتكوني مستقرة ماديا اكتر:
معروف جدا ان في الفترة دي الغلاء المعيشي هو من اكتر المشاكل المتعبة لنسبة مش قليلة من الشباب والشابات المتجوزين جديد وبيلاقوا صعوبة في انهم يوفروا لاطفالهم حياة مرتاحة من ناحية العلاج واللبس والدراسة بالاضافة لمصاريف البيت واحيتاجاته ،لكن اكيد في حالة الانجاب في سن متقدم شوية بيكونوا الزوجين مستقرين ماديا اكتر نتيجة تحقيقهم نجاحات كويسة في شغلهم وده بيخليهم يوفروا لولادهم حياة مرتاحة ومستقرة اكتر.

3-بتكوني كسبتي خبرة في تربية الطفل:
لما بتتأخري شوية في خطوة الانجاب اكيد بتكوني كسبتي خبرة اكتر في التعامل مع الاطفال وتربيتهم نتيجة انك شوفتي التجربة دي مع اخواتك واصحابك وقرايبك فبتكون عندك معرفة اكبر بطريقة حمل الطفل وإرضاعه بأمان وطريقة التصرف مع نوبات غضب الطفل وحالات مرضه وتعليمه المشي وغيرها من الحاجات اللي تخص تربية الطفل ومش هتحتاجي كل شوية انك تسألي وتطلبي المشورة من اللي حواليكي بعكس الام الصغيرة اللي دايما بتحتاج انها تسأل اللي حواليها في كل حاجة ليها علاقة بالتعامل مع الطفل.

4-بتكوني متشوقة اكتر انك تشوفي طفلك:
الام المتقدمة في السن اللي اتأخرت شوية في مسألة الانجاب بتكون متشوقة اوي انها تشوف طفلها والموضوع بيكون سبب فرحة كبيرة ليها هي واللي حواليها وبيهون عليها اي تعب بتشوفه مع الطفل بعكس بعض الامهات الاصغر في السن اللي جايز بيكونوا عايزين يأجلوا الانجاب لحد مايستمتعوا بحياتهم ويحققوا طموحهم في شغلهم قبل التفكير في الانجاب .

5-بيكون بالك طويل اكتر في التعامل مع الطفل:
كإنسانة كبيرة شوية في السن اكيد ده بيديكي خبرة اكبر في الحياة وبيكون بالك طويل اكتر في التعامل مع حكاية صعوبة النوم بالليل بسبب قلق الطفل او مرضه او بكائه المستمر غير الام الصغيرة اللي بتضايق من القلق بالليل وبكاء الطفل اللي بيحرمها من النوم والراحة.

6-بتتعايشي اسهل مع زيادة الوزن بعد الولادة:
الام الاكبر في السن بتكون مهيأة نفسيا اكتر لحكاية زيادة الوزن اثناء الحمل وبعد الولادة وبتتقبل الموضوع اسهل لانها شافت ده في كل اخواتها وقرايبها واصحابها وفرحتها بإنجاب طفلها بتكون اكبر بكتير من شعورها بالضيق من زيادة وزنها بعكس بعض الامهات الشابات اللي بيتضايقوا اوي من زيادة وزنهم وامتلاء بعض المناطق في جسمهم وبيحسوا ان تجربة الحمل والولادة حرمتهم من رشاقتهم وجمالهم.

7-بتكوني مستقرة اكتر في حياتك الزوجية:
إنجابك بعد مدة طويلة من الجواز بيخليك تكوني عرفتي كتير من طباع جوزك وازاي تتعاملي مع الخلافات اللي بتحصل بينكم وغالبا بتكونوا تخطيتوا مرحلة المشاكل بسبب الغيرة و الامور المادية والعلاقات مع الاهل والمعارف وغيرها من المشاكل اللي بتواجه الشباب الصغيرين المتجوزين جديد وحياتكم بقت هادية ومستقرة اكتر واكيد طبعا ده بيكون في مصلحة طفلك انه يتولد في اسرة هادية ومستقرة  بين اب وام عارفين ازاي يحلوا مشاكلهم بهدوء .

8-بتلاقي تضامن اكبر من اللي حواليكي:
حملك في سن متأخر شوية رغم انه بيخليكي قلقانة اكتر علي صحتك انتي وجنينك الا انه بيصب في مصلحتك لانك اكيد بتفرحي لما بتحسي بقلق جوزك عليكي اثناء الحمل من اي حاجة تتعبك او تضايقك وده طبعا بيخليكي تحسي بحبه ليكي وحرصه علي صحتك هو وكل الناس من حواليكي بعكس الام الصغيرة في السن اللي مش بتحس اوي بقلق المحيطين بيها علي صحتها لان الموضوع بالنسبة ليهم عادي.

في النهاية لو ارادة ربنا سبحانه وتعالي سمحت ليكي انك تبقي حامل في سن كبير شوية بلاش تقولي ده حمل غير مرغوب فيه وتفكري في التخلص منه ومتخليش فكر القلق علي صحتك وصحة طفلك يسيطر عليكي لان ارادة ربنا فوق كل شئ وبفضل التقدم العلمي الموجود حاليا في كتير من حالات الحمل في سن متقدم بتعدي بسلام والام بتولد بسلامة طفل سليم معافي بس المهم انك تتبعي نصايح واراشادات الدكتور اللي بيتابعك بدقة وطالما الدكتور مقالش ان في خطورة واضحة من الحمل علي صحتك وصحة جنينك يبقي من حقك تفرحي بحملك وإنجابك زي كل سيدة بتحلم تكون ام ولاحظي ان احتفاظك بحالة نفسية كويسة اثناء الحمل مهم جدا لصحة طفلك .

Share.

Comments are closed.