اشترك
like Sofy on Facebook

اعوجاج العمود الفقري

0

مشكلة اعوجاج العمود الفقري بيشتكي منها ناس كتير وليها اسباب مختلفة,وفي بعض حالات اعوجاج العمود الفقري بيتم علاجها بالعلاج الطبيعي و في بعض الحالات الاخطر شوية بيكون الحل في التدخل الجراحي. واحنا من خلال المقالة دي هنساعدكم تعرفو ايه هو اعوجاج العمود الفقري وايه هي اسبابه وايه هي افضل الطرق لعلاجه وازاي ممكن تتفادو الاصابة بيه.

ايه هو اعوجاج العمود الفقري؟
الاعوجاج ده هو عبارة عن ميل في الاتجاه بتاع العمود الفقري ممكن يكون ناحية اليمين او ناحية الشمال. ممكن شكل عمودك الفقري
يكون طبيعي لكن في اعوجاج في قليل من الفقرات. الاعوجاج ده بيكون عبارة عن حرف C او حرفS  . في اغلب الاحوال الموضوع
ده  مش بيكون مؤلم لكن في الحالات الاخطر بيكون في الم ومشاكل في التنفس.
ومن المطمئن في الموضوع ان الاعوجاج ده ممكن يتعالج بسهولة لو تم اكتشافه في الوقت المناسب لكن لو حصل تأخر في اكتشافه وعلاجه المسألة ممكن تكون اصعب.

ازاي تكتشف ان عندك اعوجاج في العمود الفقري ؟

ممكن يكون عندك اعوجاج في عمودك الفقري وممكن يكون طفلك عنده المشكلة دي واحنا هنساعدك انك تكتشفها.
مظاهر الاعوجاج في العمود الفقري عند الشخص المصاب:
-ان احد الكتفين يكون اعلي او اكبر حجما من التاني
-ان الرأس ماتكونش في مركز الجسم
-ان محيط الوسط يكون مسطح في احد الجانبين واكبر حجما في الجنب التاني وبتبان اكتر لما الشخص المصاب يحرك وسطه.
-ممكن الاعوجاج يكون مصحوب بإن رجل اطول من التانية.
-حدوث تنميل بالاطراف.
-عند الاشخاص البالغين ممكن يكون الاعوجاج مصحوب بالام وصعوبة في التنفس.
في حالة وجود اعوجاج في العمود الفقري الدكتور بيطلب من الشخص المصاب عمل اشعة تبين نسبة الاعوجاج في العمود الفقري.

اسباب الاعوجاج في العمود الفقري:
-وجود عيب خلقي مع الولادة
-وجود سبب وراثي او تاريخ للمرض في العيلة
-الجلوس بطريقة غير صحية قدام الكمبيوتر او التلفزيون او المذاكرة
-حمل الاشياء التقيلة.
-البنات اكتر عرضة للاصابة بيه من الولاد

انواع علاج اعوجاج العمود الفقري:
-التدخل الجراحي
-العلاج بالاحزمة
-العلاج الطبيعي(بالتمرينات الرياضية)

ايه هي الحالات اللي بتستدعي التدخل الجراحي؟
-لو تقرير الاشعة بيقول ان درجة الميل اكتر من 45 في الحالة دي التدخل الجراحي بيكون ضروري لمنع زيادة التقوس ومحاولة ان
العمود الفقري يرجع لوضعه الطبيعي.
الجراحة دي عبارة عن ايه:
عبارة عن اجهزة تثبيت معدنية هدفها هو ان العمود الفقري يلتئم و يرجع عظمة واحدة
بعد العملية دي المريض ممكن يفضل في المستشفي حوالي اسبوع وبيرجع لممارسة انشطته اليومية خلال اسابيع او عدة اشهر  حسب نصايح الطبيب بخصوص حالة المريض ونوعية الانشطة اللي بيمارسها.

ايه هي الحالات اللي بتستدعي العلاج بالاحزمة:
الحالات اللي بيكون فيها التقوس من 25-40 درجة وبيكون الهدف من ارتداء الحزام هو تفادي ان نسبة التقوس في العمود الفقري تزيد عن الطبيعي خصوصا في مرحلة النمو.

العلاج بالتمارين الرياضية:
-في الحالات اللي التقوس فيها بيكون اقل من 40 بعض التمارين الرياضية  بتساعد في فرد عضلات الظهر وفقرات العمود الفقري زي
تمرين العقلة ويفضل استشارة الطبيب المختص في نوعية التمرينات وكيفية ادائها عشان الوضع ميتطورش للاسوأ
-الحالات اللي بيكون فيها نسبة التقوس اكبر من 50 درجة مش بيفضل اداء تمرينات رياضية عشان الالم ميزيدش.

في اثناء مرحلة العلاج وبعدها لابد من الحفاظ علي وزن مناسب و مستويات مناسبة من الكالسيوم في جسمك من خلال الاكلات الصحية والابتعاد عن مشروبات المياة الغازية.

ازاي تتفادي مشكلة اعوجاج العمود الفقري:
لو كنت مش بتشتكي من اعوجاج العمود الفقري وعايز تتجنبها او لو كنت بتشتكي منها وتعافيت ومش عايز ترجع للحالة دي اعمل الحاجات دي:
-مارس تمرينات رياضية بشكل سليم خصوصا التمرينات اللي بتساعد في فرد عضلات الظهروفقرات العمود الفقري والتمرينات اللي
بتقوي العضلات لان ده بيخف الحمل من علي العمود الفقري اثناء شيل الحاجات التقيلة.
-حافظ علي وزن مثالي عشان ظهرك ميؤلمكش.
-اهتم بالاطعمة والمشروبات الغنية بالكالسيوم زي الجبنة واللبن والبيض والاسماك والبقوليات والخضروات الورقية وابتعد عن المياة
الغازية عشان تحافظ علي عظامك قوية.
-حاول دايما تحافظ علي وضع ظهرك مستقيم اثناء النوم والجلوس والوقوف والمشي.
-اتجنب انك تشيل حاجة تقيلة لانها بتأثر علي ظهرك.

Share.

Comments are closed.