اشترك
Buy Neuth France products

اظهري شياكتك حتي لو كنتي مليانة

0

لو جسمك مليان شوية ده مش معناه ابدا انك متظهريش شيك وانيقة وتلبسي لبس جميل او انك تلبسي بس الالوان الداكنة طول الوقت,لان الجمال مش بمقاس اللبس لكن بتناسق الوان الحاجة اللي انتي لابساها واللي تخليكي مرتاحة وتبينك بشكل حلو,وعلي فكرة كل جسم وله اللبس اللي يناسبه وانتي تقدري انك تظهري جميلة وتحبي نفسك وتكوني راضية عنها بس لو عرفتي كويس طبيعة جسمك وايه نوعية الملابس اللي تليق عليه وايه اللي متليقش عليه.

-البسي اللي يناسب مقاسك:
لاحظي ان المقاس بيختلف علي حسب اللبس ده مصنوع فين  يعني مش بالضرورة انك تختاري مقاس موحد طول الوقت,وبلاش تلبسي لبس واسع عليكي بزيادة لانه بيظهر جسمك مليان اكتر.
-اعرفي ازاي تداري المناطق المليانة في جسمك:
لاحظي ان الالوان الفاتحة والصارخة اوي في الملابس والحاجات الضيقة بتبين اكتر المناطق المليانة في جسمك لكن الالوان الداكنة زي الرمادي والاسود بتداري المناطق دي,لو كنتي مش بتحبي الملابس الغامقة او محتاجة ملابس تناسب خروجك بالنهار فممكن تلبسي شال يكون فيه الوان فاتحة فوق اللبس وتكون متناسقة مع اللبس او تجيبي بلوزة يكون فيها كشكشة او تفاصيل دقيقة زي نقط او ورود صغيرة,بس بلاش التفاصيل الكبيرة لانها بتبين العيوب اكتر.
-بلاش الملابس المخططة بالعرض:
الملابس المخططة بالعرض بتظهر اكتر تفاصيل جسمك خصوصا امتلاء الصدر والبطن,لو عايزة ملابس تبين رشاقتك اكتر يبقي ركزي علي الحاجات المخططة بالطول او بالقطر او الملابس موحدة اللون.
-الاكمام الواسعة:
الملابس اللي ليها اكمام واسعة وبتنتهي عند الكوع بتخفي امتلاء منطقة الدراعين عندك لكن الاكمام الضيقة بتبينها مليانة.
-الحزام علي الوسط:
لو عندك امتلاء في منطقة البطن والصدر يبقي الحزام علي الوسط هيداري الحكاية دي وبلاش الحزام اللي بين منطقة الصدر والبطن لانه بيبرز تفاصيل جسمك,لكن لو عندك امتلاء من ورا يبقي بلاش الحزام علي الوسط لانه هيبين عيوب جسمك من ورا.
-ابعدي عن الملابس شديدة الطول والقصر:
الباديهات القصيرة جدا بتبين عيوب البطن والطويلة جدا بتبينك مليانة من ورا,لكن الملابس متوسطة الطول اللي بتنتهي عند بداية الارداف بتدي توازن لشكل الجسم.
-خدعة فتحة الرقبة اللي علي شكلV:
اذا كان جسمك مليان من ناحية الوسط او رقبتك عريضة يبقي هتناسبك جدا البلوفرات والبلوزات اللي فتحتها كبيرة وعلي شكل حرف V لانها هتشتت انتباه الناس عن الوسط المليان.
-الاكسسوارات والشنط الكبيرة:
لو لبستي عقد كبير او سلسلة طويلة هيصرفوا نظر الناس عن امتلاء جسمك في منطقة البطن والصدر,والشنطة الكبيرة  بتداري عيوب الجسم من الجنب لانها مش هتبان صغيرة بالنسبة ليكي.
-البنطلونات الواسعة او الجونلة:
لو عندك امتلاء في الارداف يبقي الجونلة هتكون كويسة ليكي اكتر من البنطلون لكن لو الجونلة مش عملية ليكي فالبنطلونات الواسعة افضل ليكي من الضيقة واللي فيها كشكشة لانها هتداري امتلاء الارداف.
-الوقفة المظبوطة:
وانتي واقفة ركزي ان وضع ضهرك يبقي مستقيم وتشفطي بطنك شوية صغيرين لان ده هيخليكي تباني رشيقة وجميلة.

 

Share.

Comments are closed.