اشترك
Buy Neuth France products

اطفالك مش هيزهقوا في الشتا مع الافكار دي

0

الشتا السنة دي شديد اوي وللاسف ناس كتير مش بتحب تخرج من البيت كتير بسبب برودة الجو والخوف من الاصابة بمرض من امراض الشتا وبتكون مشكلة اكبر عند الاسر اللي فيها اطفال صغيرين وبيخافوا عليهم اكتر من الخروج الكتير في البرد بسبب ضعف مناعتهم اللي بيخليهم عرضة اكتر للاصابة بالامراض,بس للاسف الاطفال بتزهق من روتين القعدة في البيت طول اليوم خصوصا مع انشغال الاب والام ,تابعونا علشان تعرفوا افكار بسيطة تعملوها في البيت مع اطفالكم تسليهم وتخلي وقت القعدة في البيت في الشتا وقت ممتع مش ممل.

-احكيلهم حكاية:
دوري علي كتب شيقة فيها حكايات مسلية ومفيدة للاطفال وركزي اكتر علي الكتب اللي فيها صور تجذب انتباه اطفالك وممكن تفكري انتي في حكاية من تأليفك,وممكن تخليهم يقروا الحكاية بنفسهم وتسأليهم فهموا ايه منها لان ده هيعودهم علي حب القراية  .

-دوري لهم علي فوازير:
مهم جدا للاطفال الصغيرين انك تدوري ليهم علي افكار فوازير تخليهم يفكروا وتنمي ذكائهم ويحاولوا يكتشفوا الدنيا من حواليهم.

-غنوا مع بعض:
شوفي ايه اغاني الاطفال اللي اطفالك بيحبوها واشتركي معاهم في انكم تغنوها مع بعض ولو عندك في البيت الة موسيقية ممكن تعلميهم عليها.

-الالعاب الجماعية:
مهم جدا لاطفالك انهم يشتركوا مع بعض في الالعاب اللي بتعتمد علي التفكير لتنمية الذكاء عندهم او اللي فيها حركة او انواع الالعاب اللي فيها تعاون جماعي افضل من ان كل واحد يبقي منعزل طول الوقت مع موبايله وجهاز الكمبيرتر.

-اشركيهم معاكي في شغل البيت:
طبعا مش كل شغل البيت يناسب طبيعة الاطفال الصغيرين لكن ممكن تشركيهم معاكي في عمل الاكلات اللي بيحبوها بطريقة صحية وممكن تشجعيهم علي ترتيب ادواتهم الخاصة في اماكنها لو كان سنهم يسمح بده لان ده هيعودهم من وهم صغيرين علي المشاركة وتحمل المسئولية.

-اتفرجوا علي فيلم او العبوا مع بعض:
مهم جدا مهما كنتي مشغولة بحاجات كتير انك تقضي شوية مع وقتك مع اطفالك في الفرجة علي فيلم بس يفضل طبعا انك تشوفي الفيلم ده وتاخدي فكرة عنه قبل ماتخلي اطفالك يشوفوه,وممكن تشتركي معاهم في لعبة من العابهم المفضلة علي الكمبيوتر او الموبايل من غير ماتقضوا وقت طويل قدام الكمبيوتر والتلفزيون لان ده بيعودهم علي الكسل وقلة الحركة وممكن يصيبهم بالسمنة.

-شجعيهم علي الحركة:
حتي لو مساحة البيت عندك محدودة و ماتسمحش لاطفالك انهم يمارسوا رياضة في البيت ممكن تخليهم يتحركوا مثلا بإنك تحطي الحاجات اللي بيحبوها بعيدة عن متناول ايديهم علشان يتحركوا ويجيبوها او تشجيعهم علي ممارسة تمارين رياضية بسيطة في اماكنهم.

-خلي عندهم هواية مفضلة:
انتي اكتر واحدة عارفة كويس كل واحد من ولادك هوايته ايه،اكيد هتلاقي واحد غاوي انه يألف قصص او يرسم او يكتب شعر وواحد تاني بيحب الة موسيقية معينة،ممكن تستغلي وقت قعدتهم في البيت في تشجيعهم علي ممارسة الهواية دي.

-شجعيهم علي التفكير:
لو حد من اطفالك سألك سؤال مش ضروري تجاوبي علي طول ممكن تقوليله يدور علي الاجابة علي النت او تديله كتاب فيه اجابة لسؤاله لان ده هيشجعه اكتر انه يدور ويقرا بدل مايلاقي الاجابة جاهزة قدامه.

Share.

Comments are closed.