اشترك
Buy Neuth France products

ازاي تهيئي طفلك لاستقبال اخ جديد

0

معرفتك بخبر انك حامل للمرة التانية اكيد بتفرحك وبتفرح اسرتك وعيلتك لانك هتجيبي لطفلك اخ يشاركه في اهتماماته ويسليه ومش هيبقي وحيد ,لكن من اهم الصعوبات اللي ممكن تواجهك بعد وجود طفل جديد هي خوفك من ان طفلك الكبير يحس بتقصيرك من ناحيته وانه مبقاش هو محور اهتمامك انتي وكل اللي في البيت زي الاول وبيحس ان في حد جديد بيشاركه الاهتمام ده وبتقلقي طبعا ان طفلك الاول ميقدرش يحب اخوه الصغير بسهولة او انه يحس من ناحيته بمشاعر سلبية,خليكي معانا علشان تعرفي ازاي تخلي طفلك يفرح باستقبال اخوه الصغير والموضوع يكون مشوق بالنسبة ليه.

في حاجات ياريت تتجنبيها في التعامل مع طفلك الكبير:
-بلاش تظهري قدامه تعبك من الحمل طول الوقت لان ده بيخليه يتصور ان الطفل الصغير هو سبب تعبك وممكن ميحبوش.
-اتجنبي انك تخليه يبات برة البيت بعد الولادة لان ده بيحسسه ان الطفل الجديد مستحوذ علي كل اهتمامكم وبيخليه يغير منه.
-ماتهمليش في حقه بزيادة ,لاحظي ان الطفل التاني نايم معظم اليوم ومش محتاج منك غير انك تأكليه وتغيريله ملابسه,لكن الكبير عدد ساعات نومه اقل علشان كده هو محتاج لاهتمامك برضه.
-بلاش تقولي قدامه ان الطفل الصغير احلي منه او احسن منه في اي حاجة علشان مايغيرش منه.
-حاولي ماتظهريش غضبك بقوة من اي تصرف غريب يحصل منه زي انه يبل ملابسه او يكسر اي حاجة،فهميه غلطه بحكمة ولاحظي انه محتاج وقت علشان يتعود علي وجود شريك له في اهتمامك خصوصا لو كان سنه صغير.

ازاي تجهزي طفلك لاستقبال اخوه الصغير:
-احكيله عن ايام طفولته الاولي وان هو برضه كان زي اخوه الصغير محتاج لعناية واهتمام من نوع خاص.
-خليه يتفرج علي صور ليه وهو لسة مولود واحيكله عن ازاي كان بياكل وبيعيط وبيضحك.
-اديله عروسة صغيرة او لعبة علي شكل طفل صغير وعلميه يهتم بيها لان ده هيعوده علي وجود حد  اصغر منه في البيت محتاج اهتمام
-خديه معاكي وانتي رايحة للدكتور اثناء الحمل وخليه يتفرج علي اخوه الصغير ويسمع ضربات قلبه ويشوفه وهو بيتحرك.
-وانتي بتشتري حاجات المولود الصغير خدي الطفل الكبير معاكي وخليه يختارله ملابسه وماتنسيش تشتريله برضه ملابس والعاب زي ماهتجيبي للطفل الصغير علشان مايحسش بالتمييز في المعاملة.
-خليه يتفرج علي مشاهد في التلفزيون فيها اخوات صغيرين بيلعبوا مع بعض وبيهتموا ببعض او خليه يشوف ده في معارفكم علشان يكون مهيأ للاهتمام بأخوه الصغير.
-اشركيه في اختيار اسم اخوه الصغير لان ده هيحسسه بمشاركته ليكي في الاهتمام بالطفل الصغير.
-جهزيه نفسيا للفترة اللي هتقضيها في المستشفي بعد الولادة علشان ميقلقش عليكي بزيادة,يعني لو هتسيبيه عند حد من معارفك قوليله قبلها بفترة وعوديه انه يحب الشخصية دي ويتعامل معاها كويس.
-اشركيه في مشغولياتك الخاصة بالطفل الصغير وتغيير ملابسه ونضافته واكله.

Share.

Comments are closed.