اشترك
like Sofy on Facebook

ازاي تنظمي مواعيد نوم طفلك

0

مسألة عدم نوم طفلك بشكل متواصل بالليل دي اكيد طبعا عملالك قلق في حياتك وطبعا مش بتعرفي تنامي بالليل بسبب الحكاية دي وبتصحي الصبح مجهدة وتعبانة بسبب قلة النوم والموضوع ده اكيد بيسببلك متاعب خلال يومك خصوصا لو كنتي بتشتغلي او لو عندك اطفال تانيين وكمان بيأثر في رعايتك لبيتك,وعلي فكرة انتي مش لوحدك في المشكلة دي, في امهات كتير بيشتكوا منها ومش عارفين يعملوا ايه ,لو عايزة تعرفي ازاي تساعدي طفلك انه ينام بالليل بشكل طبيعي ومتواصل وانتي كمان تعرفي تنامي بهدوء تابعي معانا المقالة دي.

علشان تنظمي مواعيد نوم طفلك اعملي الحاجات دي:
-بلاش تبدأي في انك تحطي نظام لمواعيد نوم طفلك بعد الولادة علي طول:
لاحظي ان بعض الاطفال بيكون من الصعب عليهم انهم يناموا بالليل بشكل متواصل وطبيعي في الفترة الاولي بعد الولادة لان مخهم مش بيقدر يميز بين الليل وبين النهار غير انهم بيحتاجوا يصحوا كذا مرة بالليل علشان يرضعوا ,لكن الموضوع ده ممكن يبدأ يقل بعد مرور فترة من الولادة لان الطفل بيبدأ يصحي عدد مرات اقل علشان ياكل ,ويفضل بالنسبة ليكي في الفترة دي انك تنظمي مواعيد نومك علي حسب مواعيد نوم الطفل لحد ما يبدأ ينام بشكل متواصل اكتر.

-لاحظي ايه هي المواعيد اللي طفلك بينام فيها بشكل متواصل اكتر:
قبل ماتبدأي في تنظيم مواعيد نوم طفلك حاولي تلاحظي ايه هي المواعيد اللي بينام فيها بعمق وبشكل متواصل اكتر ويفضل انك تسجلي المواعيد دي بشكل مستمر,يعني مثلا لو لاحظتي ان طفلك بينام بشكل متواصل اكتر في المعاد من الساعة 8 بالليل للساعة 1 صباحا يبقي عوديه باستمرار انه ينام في المعاد ده و نظمي مواعيد نومك علي الاساس ده.

-ابدأي مع طفلك بالراحة:
لما تبدأي في تنظيم مواعيد نوم طفلك ابتدي من قبلها بوقت معين في انك تغيريله ملابسه وتأكليه ومن الحاجات اللي هتساعدك اكتر في انك تخليه بنام بهدوء هي انك تحكيله حكاية او تغنيله بشكل يشجعه علي النوم او تقوليله بصوت لطيف احنا هننام دلوقتي لان ده هيعوده مع الوقت علي انه ينام بشكل منتظم اكتر.

-لو حسيتي ان طفلك ميال للنعاس حطيه علي سريره:
لو لاحظتي علي طفلك انه ميال للنوم بلاش تشيليه علي ايديكي وتغنيله لان ده بياخد منك وقت طويل ومن الافضل انك تحطيه علي سريره علشان ينام علي طول وتخلي ده روتين بالنسبة له.

-بلاش تسيبي طفلك ينام كتير بعد الضهر:
لو حسيتي ان طفلك نام كتير في العربية مثلا او نام كتير بالنهار او في وقت متأخر بعد الضهر حاولي تصحيه  بلطف علشان ينام بالليل بشكل طبيعي ومن غير قلق لان القيلولة الطويلة في فترة بعد الضهر بتسبب صعوبة في النوم بالليل.

-اهتمي ان طفلك يلبس ملابس مناسبة لحالة الطقس:
لو الجو حر اهتمي انك تلبسي طفلك ملابس قطنية ولو الجو برد لبسيه ملابس تقيلة اثناء النوم اثناء  لان الاحساس الشديد بالبرودة او السخونة في الحالتين بيقلق نوم الطفل.

-سيبي باب اوضة الطفل مفتوح:
لما الطفل يبدأ ينام في اوضة لوحده خلي باب اوضته مفتوح لان ده بيحسسه بالامان وانك هتكوني جنبه وقت مايتحتاجك.

-خلي مستوى النور في اوضة الطفل هادي:
لما يقرب معاد نوم الطفل حاولي انك تبدأي تطفي النور بالتدريج لان ده بيهيأ الطفل نفسيا انه ينام اسرع.

انشرها

التعليقات مغلقه