اشترك
Buy Neuth France products

ازاي ترجعي لوزنك بعد الولادة

0

برغم ان الامومة حلم عند كل ست وهي من اكتر الحاجات اللي بتسعدها وبتحسسها ان لحياتها قيمة الا ان حكاية زيادة الوزن بعد مرور 9 شهور الحمل اكيد بتضايق اي واحدة وبتزعل لما تحس ان جسمها ترهل خصوصا في منطقة البطن وبتلاقي ان ملابسها اللي كانت بتلبسها قبل فترة الحمل مبقتش داخلة فيها ولما بتلبسها بتبين عيوب جسمها اكتر واكيد طبعا الحكاية دي بتحسسها بالاحراج قدام الناس وكمان قدام شريك حياتها,وطبعا اي واحدة بيبقي نفسها انها ترجع لوزنها المثالي اللي كانت عليه وتلبس كل اللي نفسها فيه .خصوصا ان بعد الولادة الام بتستقبل زوار كتير في البيت وبتبقي نفسها تظهر قدامهم بأجمل صورة. تابعينا لو عايزة تعرفي شوية حاجات تساعدك ان تقبلي نفسك بعد الولادة وكمان ترجعي لوزنك اللي كنتي عليه قبل الحمل.

-خليكي صبورة مع نفسك:
لاحظي ان وزنك زاد اثناء الولادة حوالي من 10 ل 20 كيلوجرام ودول مش هتفقديهم بمجرد ماتولدي لان في خلال فترة الحمل الجنين بيكبر مع الوقت جوه الرحم غير احتباس السوائل والتغيرات الهرمونية وده كله مش بيخليكي تفقدي الوزن الزايد بعد الولادة علي طول لكن بيتم فقدانه بعد فترة من الولادة.

-بلاش تتبعي ريجيم قاسي:
جسمك بعد الولادة بيكون محتاج للتغذية السليمة وانك تمديه بكل احتياجاته من المعادن والفيتامينات والبروتين والكالسيوم والحديد علشان كده الريجيم القاسي بيعرضك لمتاعب صحية كبيرة ,وبلاش تفوتي اي وجبة من الوجبات الاساسية وركزي علي اكل الخضروات والفواكة الغنية بالالياف بين الوجبات, وممكن تاخدي رأي الدكتور اللي بيتابع معاكي في ازاي تتبعي نظام صحي متوازن يخليكي تستعيدي صحتك ورشاقتك بعد الولادة وماتنسيش ان شرب 8 كوبايات من المية مهم جدا لصحتك وجمالك ورشاقتك  .

-اهتمي بممارسة التمارين الرياضية:
اتناقشي مع الدكتور اللي بيتابع حالتك في مسألة انك تعملي شوية تمرينات رياضية خفيفة لما تستعيدي صحتك بعد الولادة ومع الوقت زودي قوة التمرينات ومدتها علي حسب قدرتك ومن افضل التمرينات ليكي انك تمارسي تمارين البطن الخفيفة او رياضة المشي لمدة تلت او نص ساعة 5 ايام في الاسبوع ولما تستعيدي لياقتك البدنية زوديهم ل6 ايام في الاسبوع .

-ركزي علي الرضاعة الطبيعية:
الرضاعة الطبيعية بتساعدك في انك ترجعي لوزنك الطبيعي اللي كنتي عليه قبل الحمل لانها بتخلص الجسم من الدهون الزيادة وبتساعد في حرق سعرات حرارية وبتسهل ان البطن ترجع لوضعها الطبيعي بعد شهور من الولادة.

-اهتمي بالراحة والنوم:
الحرمان من النوم والاجهاد الزايد بيؤدي لتراكم الدهون وزيادة الوزن علشان كده حاولي ترتاحي كفاية وتنامي لساعات كافية ومتواصلة من 7 ل 8 ساعات وان كان ده صعب بسبب رعاية طفلك وصعوبة تنظيم مواعيد نومه فده بيتظبط مع الوقت ونوم الطفل بينتظم.

-حبي نفسك:
لازم تحاولي انك تتعايشي مع طبيعة جسمك بعد الولادة وتقبلي نفسك وتعرفي كويس ان حكاية الرجوع لوزنك اللي كنتي عليه قبل الحمل بتاخد شوية وقت وبتتظبط مع الرضاعة الطبيعية والرياضة والتغذية السليمة,ومن الحاجات اللي هتخليكي تحسي اكتر بجمالك رغم زيادة وزنك هي انك تختاري ملابسك بشكل يخليكي تباني اطول وارفع ويفضل انك تتجنبي الملابس الفاتحة اللي بلون موحد  لانها بتبين عيوب جسمك اكتر ولو كنتي مش من محبي الملابس الداكنة فممكن تلبسي ملابس فاتحة بس بألوان ورسومات متنوعة لانها بتبينك رشيقة اكتر.

Share.

Comments are closed.