اشترك
Buy Neuth France products

ازاي تختاري مكياجك المناسب للون بشرتك

0

اي بنت واي ست في الدنيا بتحلم انها تبقي دايما جميلة ومتألقة زي نجمات السينيما والموديلز اللي بتشوفهم في الاعلانات,وبيبقي نفسها ان مكياجها يكون جميل ومتناسق ويبين ويظهر جمالها اكتر, علشان كده مهم جدا لاي واحدة انها تختار المكياج المناسب للون وطبيعة بشرتها لان كل بشرة وليها الالوان اللي تناسبها وتظهر جمالها اكتر,تابعونا علشان تعرفوا ازاي تختاروا الوان المكياج اللي يناسب لون بشرتكم ويبين جمالها.

-كريم الاساس:
اتأكدي ان مستوي الاضاءة في المحل اللي بتشتري منه كريم الاساس مناسب وبلاش تجربي كريم الاساس علي ايديكي او رقبتك لان ممكن لونهم يكون مختلف عن لون وشك ومن الافضل انك تجربي كريم الاساس علي جزء صغير من خدك,اختاري كريم اساس يكون افتح من لون بشرتك بدرجتين تقريبا وبلاش تحطي منه كتير لانه بيبان مصطنع ومش طبيعي,وركزي ان كريم الاساس يكون مناسب لطبيعة بشرتك يعني لو بشرتك جافة اختاري كريم اساس يكون غني بالمرطبات ولو بشرتك دهنية اختاري كريم اساس تكوني متأكدة كويس انه خالي من الزيوت.

-احمر الخدود:
اهتمي ان لون احمر الخدود اللي بتحطيه يكون مناسب لبشرتك يعني مثلا لو لون بشرتك فاتح يبقي الانسب ليكي هو اللون الوردي ولو بشرتك لونها عادي او متوسط يبقي الانسب هو انك تختاري اللون المشمشي او  الخوخي ولو بشرتك سمرا يبقي الانسب هو اللون النحاسي او البني،وبلاش تتقلي من احمر الخدود بشكل مبالغ فيه لانه بيخلي منظر الوش مش حلو.

-ظل العين:
الافضل انك تختاري ظل العين اللي يتناسب مع اللبس اللي هتلبسيه لكن ممكن تختاريه علي حسب لون بشرتك يعني لو بشرتك من النوع الداكن اختاري لون ظل العين البرونزي ولو لون بشرتك متوسط بين الفاتح والداكن اختاري لو ظل العين من درجات الاخضر او البني ولو لون بشرتك فاتح يبقي الانسب ليكي هو درجات الازرق او الوردي.

-احمر الشفاة:
ممكن تحطي احمر الشفاة اللي يمشي مع لون لبسك وممكن تحطي منه علي حسب لون وشك يعني ممكن لو لون بشرتك غامق تحطي الوان زي البنفسجي او الوردي ولو لون بشرتك متوسط ممكن تستعملي درجات البيج او البني او الاحمر ولو لون بشرتك فاتح يبقي الانسب ليكي هي درجات الاحمر والوردي

Share.

Comments are closed.