اشترك
Buy Neuth France products

ازاي تتغلبوا علي تقلبات المراهقة

0

سن المراهقة بالنسبة للشباب بيشكل بداية مرحلة جديدة في حياتهم لانهم بيكونوا تخطوا مرحلة الطفولة ودخلوا في مرحلة مختلفة بيبدأوا يشوفوا فيها الدنيا بشكل تاني، وكتير من الشباب بيحسوا بتغييرات في الحالتهم النفسية ومشاعر متقلبة بين الفرح والحزن او القلق وعدم الاستقرار والرغبة في التمرد علي توجيهات الاهل والميل للجنس الاخر والتفكير في احلام اليقظة والاتجاه للعادات السيئة زي التدخين وتقليد اصدقاء السوء,اعرفوا معانا ايه اسباب التقلبات المزاجية في حياة المراهقين وازاي يتعاملوا معاها.

اسباب التقلبات النفسية للمراهقين:
-التغييرات في الهرمونات في مرحلة المراهقة بتخلي المراهق ميال للتوتر والتقلبات المزاجية.
-احساس المراهق انه تعدي مرحلة الطفولة وفي نفس الوقت مبقاش شخص مكتمل النضج بيخليه يحس بتخبط في مشاعره.
-رغبة المراهق في انه يكون له شخصيته المستقلة عن اهله ويرتبط بأصحابه اللي احيانا بتتعارض مع اوامر وتوجيهات الاهل بتخليه
يحس بصراع نفسي جواه.
-خوف المراهقين من البلوغ والتغييرات اللي بتحصل في اجسامهم والزيادة في الوزن اللي مش بيكونوا مستعدين ليها نفسيا ومش قادرين  يتقبلوها بيخليهم  يحسوا بمشاعر متقلبة.
-شعور المراهق بالضيق من منظر حبوب الشباب اللي بتبدأ تظهر في وشه ومكانش متعود عليها قبل كده.
-توتر المراهق بسبب زيادة توجيهات الاهل وانتقاداتهم وصعوبة المناهج الدراسية اللي بتتفرض عليه في المدرسة وكمان بسبب بعض القيود اللي بتتفرض عليه زي عدم الاختلاط بالجنس الاخر.
-الصراع بين الرغبة في الانفتاح علي المجتمع والحياة وبين تقاليد المجتمع.

مظاهر التغييرات النفسية للمراهق:
-صعوبة او افراط في النوم.
-السرحان وعدم الرغبة في المذاكرة.
-الاحساس بالضعف والارهاق والام في بعض المناطق في الجسم زي المعدة.
-الميل للتفكير في الجنس الاخر.
-التمرد علي الاهل.
-الميل للعصبية واحيانا للعزلة والانطواء.
-حب الاستطلاع وفي اسوأ الحالات بيكون في ميل للعادات السيئة زي التدخين والادمان والعلاقات السيئة.

ازاي المراهقين يتخطوا المرحلة دي بأمان:
-الاهتمام بالتغذية السليمة والتركيز علي العناصر الغنية بالبروتين والكالسيوم والفيتامينات والالياف لانها بتمد الجسم بالطاقة اللي  بيحتاجها خلال  اليوم وبتجنب الشباب الاحساس بالارهاق والتعب خلال اليوم.
-التقليل من السكريات والدهون والمقليات لانها بتسبب زيادة الوزن وبتزود من ظهور حب الشباب في الوش.
-تجنب القعدة قدام التلفزيون والنت وقت طويل خصوصا قبل النوم لان ده بيسبب زيادة الوزن وكمان بيزود مشاكل صعوبة النوم.
-لازم الشاب او الشابة يحاولوا انهم يحبوا نفسهم ويتقبلوها بكل التغييرات اللي بتحصل في شكلهم ومظهرهم في المرحلة دي ويعرفوا
كويس انه حتي الممثلين والنجوم معرضين للزيادة في الوزن وظهور الحبوب في وشهم وغيرها من التغيرات ويحاولوا انهم يعوضوا
ده بالاهتمام المعتدل بمظهرهم.
-التركيز علي ممارسة التمارين الرياضية او اي هواية مفيدة في وقت الفراغ لان ده بيحمي من زيادة الوزن والسرحان والتصورات
الجنسية غير ان ده بيساعد علي تحسين الحالة النفسية والتخلص من المشاعر السلبية وكمان بيساعد في تحسين الاداء الدراسي.
-وجود هدف مناسب في حياة المراهق بيساعده انه يكون عنده حافز وبيحميه من ضعف الاداء الدراسي والسرحان في المذاكرة.
-الاهتمام بالتواجد في مجموعات اصدقاء اسوياء ويشجعوا الشاب او الشابة علي العادات الايجابية.
-محاولة الشاب او الشابة التقرب من الاهل وتقدير قلقهم وخوفهم علي ابنهم المراهق ومحاولة تقريب وجهات النظر وسماع رأي الاهل
باهتمام واحترام.

Share.

Comments are closed.