اشترك
like Sofy on Facebook

ازاى تختارى لأبنك الألعاب المناسبه ؟

0

 الالعاب حاجة اساسية فى حياة كل طفل ووسيلة مهمة لتسليته ودائما بنلاقى الاطفال بيقضوا معظم و قتهم مع اللعبة اللى بيحبوها وطبيعى ان اللعب بتاثر بشكل كبير فى شخصية الطفل و فى تفكيره و سلوكياته وانتشرت دلوقت الالعاب الالكترونية و بقت تجذب الاطفال ليها بشكل ملحوظ و بنسمع كل يوم عن تحذير منها , وطبعا كل ام و اب بيسالوا نفسهم ايه الالعاب اللى اختارها لطفلى و ايه تاثير  الالعاب الالكترونية على طفلى ؟اعرفوا معانا اجابات  كل الاسئلة اللى بتدور فى ذهنكم فى الموضوع ده .

  • دور الألعاب فى بناء  الطفل :

 1-بينمى اللعب معظم المهارات اللى بيحتاجها الطفل فى المستقبل و اللى بتكون شخصيته و بتوسع مهاراته الشخصية و المدرسية و ممكن انه يعتبر اساس للمتطلبات المهنية للمستقبل .

2- كون اللعب فيه كتير من الحركة فده بيقوى الجسم و بينمى العضلات و بيزود من انتباه الطفل .

3- الالعاب بتخلى الطفل يكتسب مهارات جديدة زى الاستكشافو التركيب و التنظيم وبتنمى القدرات العقلية للطفل .

4-للالعاب و خصوصا الجماعية دور فى تنمية الثقة بالنفس وزيادة العلاقات الاجتماعية و حبه للمجموعة و تقدير دورهم .

5-الالعاب ليها دور كبير فى تنمية الجانب الاخلاقى عند الطفل عن طريق الصفات اللى ممكن انه يكتسبها من خلال اللعبة زى الامانة و الصدق و التعاطف مع المهزوم .

  •  الألعاب الالكترونية :

نتيجة لتاثير  الالعاب الكبير على  الطفل فده معناه ان ممكن يكون ليها تاثير سلبى برده و من اكبر الامثلة الالعاب الالكترونية و الاضرار السلبية الكتيرة اللى ممكن انها تسببها للطفل .

– التاثير البدنى :

بتاثر على صحة النظر نتيجة تعرض الطفل لمجالات الاشعة الكهرومغناطيسية لساعات طويلة وبتسبب الام الرقبة وبتاثر على الجهاز العصبى للطفل  وبتسبب البدانة لان الطفل بيفضل لساعات طويلة من غير حركة ,وبتسبب فى سوء التغذية لان الطفل بيكون كل تركيزه مع اللعبة و بيسنى تماما هو بياكل ايه و تنظيم اكله و نوع الاكل اللى بياكله .

– تاثير نفسى و اجتماعى :

جلوس الطفل لساعات طويلة قدام شاشة ممكن يخليه منعزل و غير اجتماعى بالنسبة للاطفال اللى فى نفس سنه و نوع اللعبة نفسها بتاثر على شخصية الطفل وممكن تتسبب فى بعض السلوكيات الغلط زى الانانية و العنف واكتساب بعض العادات و التصرفات الغلط .

الحل ايه ؟

– نقدر نقول ان المشكلة مش فى الالعاب الالكترونية نفسها انما المشكلة الاكبر فى ادمانها هو اللى بيكون ليه تاثير سلبى كبير على الطفل لو الاب و الام ماكنش عندهم الوعى الكافى فى التعامل معاها .

– مهم ان الاب و الام يكونوا فى حوار مع اطفالهم حوالين اللعبة و يتابعوهم و يناقشوهم فيها و يصححو اى مفاهيم غلط اتكونت من خلال اللعبة .

– تحديد وقت معين للكمبيوتر والتليفزيون و الالعاب الالكترونية بحيث ان الطفل يتعلم انه ينظم وقته و يستفاد بيه فى حاجات تانيه .

– التركيز فى اختيار اللعبة عند شراءها بحيث انها تكون مفيدة للطفل و مناسبة لسنه وده بيكون متوضح فى تقييم على غلاف اللعبة اسمه (ESRB RSTING).

 

  • نصائح عامة لاختيار العاب الطفل :

1- اختيار اللعبة المناسبة لسن الطفل و طريقة تفكيره و اهتماماته.

2- اختيار الالعاب اللى بتساعد فى تنمية مهارات معينة .

3- اختيار اللعبة اللى بتساعد فى تنمية موهبة معينة بيمتلكها طفلك زى العاب الكتابة و الرسم و الموسيقى .

4- البعد عن الالعاب الخطرة زى اللى بيكون فيها قطع صغيرة كتيرة و هتجيبها لطفل اقل من 3 سنين او الالعاب اللى ليها اطراف حادة و مدببة .

5- التنويع فى اختيار الالعاب اللى بتساعد فى النمو الجسمى و العقلى و اللغوى و الاجتماعى .

6- اختيار الالعاب اللى بتساعد فى تنمية الابداع عند الطفل و تنمية مهاراته الادراكية زى تكوين اشكال مختلفة زى المنازل و الجسور .

7- اختيار الالعاب اللى بتحث الطفل على القراءة وبتخليه يتعود عليها من سن صغير .

8- اختيار العاب تشجع الطفل على التحدى والعاب الذكاء .

Share.

Comments are closed.