اشترك
Buy Neuth France products

احدث وسايل منع الحمل

0

كتير من الازواج بيفضلوا انهم يشوفوا وسيلة مناسبة لمنع الحمل لاسباب مختلفة,يمكن بسبب الرغبة في تأجيل مسألة الانجاب في اول الجواز ويمكن بسبب وجود طفل جديد وبتكون الام عايزة تديله كل وقتها واهتمامها في البداية,اعرفوا معانا عن افضل وسايل منع الحمل وانسبها .

-الوسايل الهرمونية:

بتعتبر هي الحل الافضل للسيدات اللي معندهمش مشاكل مع وسايل منع الحمل عن طريق الهرمونات ومن اهمها:
نوفا رينج:
عبارة عن حلقة زي الخاتم وبتكون شفافة ومرنة وبتدخليها في المهبل في اي يوم من ايام دورتك الشهرية وبتخليها في المهبل لمدة 3 اسابيع  علشان تفرز هرموني الاستروجين والبروجسترون في جسمك خلال الشهر وبعدين بتشيليها لمدة اسبوع وتستني لحد ماتجيلك الدورة الشهرية وبعدين بتدخلي واحدة تانية.
مميزاتها:
-بتريحك من مشكلة انك تنسي تاخدي حباية منع الحمل في مرة من المرات.
-مش بتسبب الالتهابات المهبلية ومش بتعوق الاتصال اثناء العلاقة زي اللولب.
-افراز الهرمونات من خلالها بيكون قليل جدا ومش بيوصل للكبد زي الوسايل اللي بتتاخد عن طريق الفم.
-فعالة جدا بنسبة 99% لو تم استعمالها بشكل امن.
ملاحظة:
لو عايزة تستعملي نوفا رينج بأمان بدون اثار جانبية يبقي يفضل الامتناع تماما عن التدخين علشان مايسببش تجلط في الدم .

-الاورثو ايفرا:
ودي عبارة عن لاصقة بتحطيها علي جلدك وبتحتوي علي هرموني الاستروجين والبروجسترون وبتتحط في منطقة اسفل البطن او الارداف لكن بلاش تحطيها علي منطقة الثديين وبتلزقيها لمدة 3 اسابيع(بتغيري واحدة كل اسبوع وتحطي واحدة غيرها) وبعدين بتشيليها لحد ماتجيلك الدورة الشهرية وبعدين  تحطيها تاني اثناء الدورة الشهرية,والوسيلة دي بتساعد علي افراز جرعات اكبر من هرمون الاستروجين .
مميزاتها:
-مش بتحتاج منك انك تفتكري تحطيها كل يوم زي الوسايل التانية.
-من الممكن انه يحصل حمل بمجرد ماتشيليها.
-مش بتعوقك عن ممارسة انشطتك العادية.
ملاحظة:
لازم تستشيري دكتور متخصص قبل ماتستعمليها اذا كان في تاريخ في عيلتك للاصابة بسرطان الثدي او لو كان عندك ارتفاع في نسبة الكوليسترول او امراض جلدية زي الاكزيما او الصدفية.

-لولب ميرينا:
وده عبارة عن جهاز بلاستيكي صغير بيحتوي علي هرمون ليفونورجيستريل وبيستمر مفعوله لمدة 5 سنين .
مميزاته:
-بيساعد في علاج حالات النزيف الشديد اثناء الدورة الشهرية.
-مش بيأثر علي الخصوبة بمجرد التوقف عن استخدامه.

غطاء عنق الرحم:
عبارة عن غطاء مطاطي بيغطي عنق الرحم وبيمنع وصول الحيوانات المنوية ليه وبيتم دهنه بمادة بتبيد مفعول الحيوانات المنوية.
مميزاته:
-فعال بنسبة من 80-90% في منع الحمل.
-بيحمي من الاصابة ببعض الامراض المنقولة جنسيا.

ملحوظة:
-المفروض مايفضلش في المهبل لمدة اكتر من 48 ساعة.
-ممكن في بعض الحالات يؤدي للاصابة بحساسية.

Share.

Comments are closed.