اشترك
like Sofy on Facebook

احتقان الثديين بعد الولادة

0

الام بعد الولادة بأيام قليلة بتحس بكبر في حجم الثديين بيخليها تشعر بعدم الراحة بسبب امتلاء الثديين باللبن اللي الطفل بيحتاجه علشان الرضاعة وده بيسمي احتقان الثديين,من خلال المقالة دي هنعرفك ايه هي اسباب احتقان الثديين وبيستمر لحد امتي بعد الولادة و وطرق تجنبه والتخلص منه واذا كان ينفع ان الام تستمر في ارضاع طفلها في الفترة دي ومدي تأثير الحالة دي علي صحة الطفل.

ازاي تعرفي ان عندك احتقان في الثديين:
بعد الولادة بمدة تتراوح بين يومين ل 5 ايام بتحسي بتقل وكبر في حجم الثديين بسبب وجود كمية كبيرة من الحليب فيهم علشان رضاعة الطفل وكمان بسبب تدفق الدم في خلايا الثديين ودي حاجة ضرورية جدا لافراز الحليب، والحالة دي بتبقي اسهل شوية بعد ايام قليلة من  الولادة وبتنتهي بعد حوالي اسبوعين او 3 وهتحسي ان الثديين اخف واصغر شوية حتي مع زيادة افراز اللبن,وممكن تحسي بتورم في الثديين وحرقان فيهم اثناء عملية الرضاعة او باستمرار بالاضافة لحمي مصحوبة بارتفاع بسيط في درجات الحرارة.

ايه اسباب احتقان الثديين:
عدم خروج اللبن من الثديين بشكل طبيعي من خلال الرضاعة او عدم ضخ اللبن في الايام الاولي من بعد الولادة او توقف الام عن ارضاع طفلها بشكل مفاجئ او ان الطفل يكون وضعه مش صح اثناء الرضاعة,ده بيسبب انسداد في بعض قنوات الثدي  وبيؤدي لتورم واحمرار فيه.

ازاي تتجنبي احتقان الثديين:
مش كل ام بتكون معرضة بعد الولادة لاحتقان الثديين لكن ممكن تقللي من احتمال احتقان الثديين بالحاجات دي:
-لو في امكانية انك ترضعي طفلك خلال ساعتين من بعد الولادة  ده هيقلل من احتقان ثدييكي.
-في الايام الاولي من بعد الولادة واظبي علي ارضاع طفلك كل  ساعتين تقريبا لان ده هيقلل من تراكم اللبن في الثديين اللي بيسبب احتقانهم.
-خلي طفلك يرضع من الثدي الاول لمدة 10 دقايق او 20 دقيقة وبعدين خليه يرضع من الثدي التاني ولو كان شبع من الثدي الاول يبقي ابدأي بالثدي التاني المرة اللي بعدها.
-لو حسيتي بامتلاء ثدييكي باللبن في وقت نوم الطفل او اذا كان مش جعان يبقي استعملي مضخة الثدي للاحتفاظ باللبن.
-خدي حمام دافي قبل الرضاعة او استعملي كمادات مية دافية للثديين لان المية الدافية بتقلل من الاحساس بالاحتقان وبلاش المية السخنة لانها بتزود من الشعور بالاحتقان والورم .
-وانتي بترضعي طفلك دلكي الثدي اللي هو بيرضع منه لان ده بيريحك من الاحتقان وبيسهل عملية الرضاعة.
-استعملي كمادات مية باردة لثدييك بعد الرضاعة لانها بتخفف من احساسك بالورم.
-اشربي سوايل كتيرة وركزي علي المية.

هل ممكن تستمري في ارضاع طفلك في حالة احتقان الثديين:
استمرارك في ارضاع طفلك مهم جدا ليكي لحمايتك من زيادة الاحتقان في الثديين بسبب تراكم اللبن فيهم,ركزي كويس جدا علي علامات الجوع عند طفلك زي عدم الراحة او بداية اصدار صوت عالي ورضعيه فورا.

هل احتقان الثديين له تأثير علي طفلك:
احتقان الثديين ممكن يخلي طفلك مياخدش كمية اللبن اللي بيحتاجها بسهولة,لو لاحظتي علي طفلك انه مش بيشبع بعد الرضاعة او مش بياخد كمية اللبن اللي محتاجها استشيري دكتور اطفال.

 

Share.

Comments are closed.