اشترك
Buy Neuth France products

احتفل بعيد الحب بطريقة جديدة

0

لما بتيجي احتفالات عيد الحب المشهورة بيوم الفلانتين اول حاجة بتيجي في بال معظم الناس هي الاحتفال بعيد الحب مع الحبيب او الحبيبة,لكن في الحقيقة ان عيد الحب مايخصش بس المتجوزين والمرتبطين لكن عيد الحب ينفع يكون لكل الناس ,ممكن يكون للأب والام والاخوات في البيت والقرايب والاصحاب والجيران وزمايل الشغل والدراسة وحتي للناس اللي منعرفهمش,وطبعا الحب مش ضروري يكون بالكلام الرومانسي والهدايا لكن ممكن يتم التعبير عن الحب بين  كل الناس عموما بطرق مختلفة كتير.
-قضي وقت سعيد مع اسرتك:
كتير من الناس بسبب الاعباء ومشغوليات الحياة بينسوا حتي انهم يقضوا ولو وقت قليل مع اسرهم, خلي عيد الحب فرصة انك تقضي وقت مع اسرتك,اسألهم عن احوالهم,عبرلهم عن حبك ليهم مش بس بالكلام لكن بالفعل,اكيد هتلاقي والدتك او والدك او اخواتك محتاجين انك تساعدهم في حاجة,بجد لو ساعدتهم بشكل عملي هتلاقي انك فرحت وكمان فرحتهم مش بالهدايا والكلام لكن بالمشاركة العملية وممكن تحاول تكسر الروتين اليومي بتاعكم بخروجة حلوة او تتفرجوا علي فيلم مع بعض .

-اتقابل مع اصحابك اللي مش مرتبطين:
كلم اصحابك اللي مش مرتبطين واتفقوا انكم تخرجوا و تقضوا يوم ممتع مع بعض بالشكل اللي يفرحكم,ممكن تتفرجوا علي فيلم او تروحوا مكان جديد عليكم او تاكلوا مع بعض في مكان تكونوا بتحبوه او تحاولوا تقضوا اليوم بشكل مختلف وتفرحوا وتجددوا حياتكم.

-ابسط نفسك:
بلاش تعزل نفسك عن الناس في يوم عيد الحب بحجة انك مش مرتبط بالعكس خلي اليوم ده فرصة تبسط فيها نفسك ,اشتري لبس جديد واهتم بأناقتك ومظهرك,بالطريقة دي هتقدر تحب نفسك وتبقي مبسوط بكل حاجة بتعملها.

-مارس هواياتك:
لو دورت اكيد هتلاقي ليك هوايات بتحبها او حاجة بتعملها وبتبسطك بقالك كتير معملتهاش زي سماع موسيقي او انك تتفرج علي فيلم بقالك كتير مشوفتوش,خلي اليوم ده فرصة انك تعمل كده.

-تواصل مع الناس بإيجابية:
يوم عيد الحب هو احلي فرصة تسأل فيها علي قرايبك واصحابك وجيرانك اللي بقالك كتير مكلمتهمش او تتصالح مع اي حد انت زعلان منه او علي خلاف معاه,علشان كده خسارة اوي اليوم ده يعدي عليك وانت مقصر في حق حد او زعلان مع حد ولاحظ ان الشخص اللي بيبدأ بالسؤال والصلح مع الناس بيكون شخص محبوب جدا من اللي حواليه.

-افتكر الناس المحتاجة للدعم:

احلي حاجة تعملها في عيد الحب انك تدور حواليك علي الناس المحتاجين للدعم زي المرضي وكبار السن والايتام وتحاول ترسم بسمة علي شفايفهم في اليوم ده وتحسسهم انك فاكرهم ومهتم بيهم لان ده شئ بيسعدهم جدا,ولاحظ ان الدعم مش بالضرورة يكون مادي لكن الدعم المعنوي للناس المحتاجة مايقلش اهمية عن الدعم المادي,وممكن تخلي الاهتمام بالمحتاجين للدعم مش بس قاصر علي يوم عيد الحب لكن جميل جدا انك تستمر في دعمك وعطائك ليهم في باقي الوقت.

 

Share.

Comments are closed.