اشترك
Buy Neuth France products

اتغلبوا علي الملل في حياتكم الزوجية ب 8 وسايل

0

الملل والروتين في الحياة الزوجية حالة شائعة عند كتير جدا من الازواج والزوجات في الوقت الحالي،في بعض الحالات الروتين بيكون بسبب ضغوطات الحياة والانشغال بالشغل وتدبير احتياجات البيت ومسئوليات الاولاد وفي بعض الحالات برضه تأخر الانجاب بعد فترة من الجواز بيخلق ملل وفراغ في حياة الزوجين وبيحسوا ان كل يوم في حياتهم زي اللي قبله ومفيش جديد وفي كل الاحوال الملل ده بيضر بنفسية الزوجين مع بعض وبيحرمهم من الاستمتاع بحياة زوجية سعيدة وبيأثر علي ادائهم في شغلهم وتربية ولادهم،اعرفوا معانا شوية طرق بسيطة تتغلبوا بيها علي الملل في حياتكم الزوجية وتكسروا الروتين اليومي بتاعكم.
1-اعملوا حاجة جديدة:
استغلوا يوم الاجازة بتاعكم في انكم تخرجوا مع بعض في مكان مروحتوهوش قبل كده او حتي اي مكان بتحبوه او تجربوا اي حاجة جديدة,افتكروا امتي اخر مرة خرجتوا مع بعض وانبستطوا وقضيتوا وقت لطيف مع بعيد عن المشاكل والهموم واحتياجات الابناء,لو ولادكم كبروا شوية ممكن تسيبوهم عند جدتهم مثلا وتخرجوا سوا,اي زوجين محتاجين من وقت للتاني انهم يبعدوا عن الهموم والمتاعب اللي بتبعدهم عن بعض ولو وقت قصير علشان يقدروا يرجعوا لمسئولياتهم بنشاط وحيوية واداء احسن.

2-اطفوا التلفزيون ولو ساعة:
كلنا في الفترة دي بقينا ننشغل بمتابعة الاحداث المتلاحقة السريعة في العالم من حوالينا وبنقضي وقت طويل اوي قدام برامج التلفزيون ومتابعة مواقع التواصل علي النت،لو جربتوا تبعدوا عن كل مصادر الدوشة دي ولو ساعة في اليوم وقعدتوا مع بعض وكل واحد فيكم حاول يسمع اخبار واحتياجات ومشاكل التاني ويحس بيه ويخفف عنه او حتي تتكلموا في اي موضوع اكيد حياتكم هتتجدد وهتبقي احسن.

3-غيروا في نظام يومكم:
مش لازم كل يوم تتعشوا في نفس المعاد وتاكلوا نفس الاكل وتتفرجوا علي التلفزيون في نفس المعاد وتخرجوا في نفس الوقت او نفس المكان كل مرة لان ده اكيد هيحسسكم بالزهق بعد فترة،غيروا في مواعيد الاكل وجربوا لو تزورا ناس بقالكم كتير مقعدتوش معاهم او تتفرجوا علي حاجة مختلفة في التلفزيون،ماتخلوش كل يوم يكون عبارة عن نسخة مكررة من اللي قبله.

4- كلام الحب مش مراهقة:
مهما كبرتوا او مهما مرت فترة طويلة علي جوازكم مش عيب ابدا ان كل واحد فيكم يقول للتاني كلام لطيف يعبرله بيه عن حبه وتقديره لان ده بيكسر ملل حياتكم،كلام الحب مش تفاهة ولا مراهقة لان اي انسان بيحتاج انه يحس انه محبوب ومرغوب من شريك حياته.

5-ابعد حبة تزيد محبة:

من اكتر الحاجات اللي بتوصل للملل والروتين في الحياة الزوجية هي الغيرة الزايدة عن حدها و كتر الاسئلة بإلحاح وان كل طرف يبقي عايز يعرف كل حاجة عن تفاصيل يوم التاني،الحقيقة ان لو كل طرف حاول ولو علي فترات متباعدة انه يعمل حاجة مختلفة بعيد عن التاني زي مثلا انه يخرج مع اصحابه او يقعد بعض الوقت لوحده في هدوء لان ده بيخلي كل طرف يشتاق للتاني ويحس بقيمته عنده وده مهم جدا لتغيير روتين حياتكم الزوجية.

6-التجديد في المظهر:

كل زوج وكل زوجة بيحبوا انهم يشوفوا الطرف التاني دايما متجدد وانيق في مظهره،حاولوا من وقت للتاني تشتروا لبس جديد أو تغيروا في تسريحة شعركم وماتخلوش انشغالكم بالبيت والاولاد والشغل ينسيكم اهمية الاهتمام بمظهركم ورشاقتكم,كل دي حاجات هتساعدكم تتغلبوا علي الملل في حياتكم. 

7-الصراحة مع النفس:
لو كنتوا حاسين بالملل في حياتكم الزوجية فيمكن ده سببه ان حد فيكم فيه عيب كبير بيضايق التاني مرات متكررة وبيرفض يعتذر او يصلح من نفسه،من الحاجات اللي هتعالج ده هي ان كل طرف يقعد مع نفسه ويصارحها بعيوبها اللي بتضايق الطرف الاخر ويحاول يعالجها،لما الطرف الاخر هيحس ببداية تغيير للاحسن اكيد ده هيحسن من حياتكم ويجددها.

8-حسس الطرف الاخر بتقديرك لمجهوده:
من الحاجات اللي بتخليكم تحسوا بالملل في الحياة الزوجية هي ان كل طرف فيكم  بيتعب اوي جوة البيت او برة في الشغل ومش بيلاقي تقدير من الطرف الاخر،لو كل طرف فيكم شكر التاني علي مجهوده وتعبه كل واحد هيعمل اللي عليه بحب وبرغبة في اسعاد التاني مش بملل وغصب.

Share.

Comments are closed.