اشترك
like Sofy on Facebook

اتبعي الـ7 خطوات دول علشان تعلمي طفلك انه ميكدبش

0

بعض الاطفال لما بيبتدوا يدخلوا في سن الادراك احيانا بيلجأوا انهم يكدبوا لو عملوا حاجة غلط زي مثلا انهم يكسروا حاجة في البيت او يتعاملوا بأسلوب مش كويس مع حد او لو مجاوبوش كويس في الامتحان،وبيلجأوا للكذب بهدف انهم ينقذوا نفسهم من التعرض للعقاب والتوبيخ من اهاليهم,تابعي معانا المقالة دي واعرفي ازاي تخلي طفلك يكتسب السلوكيات السوية وتحميه من انه يتعلم الكذب.
1-خليكي قدوة لابنك:
طفلك مش بيتعلم من حد قد مابيتعلم منك انتي ووالده مهما كان صغير، علشان كده اتجنبوا تماما انكم تكدبوا قدام ابنكم ايا كان الموضوع,وركزي كويس جدا في وعودك اللي بتوعدي طفلك بيها وبلاش تخلفيها ابدا ،لو في مرة وعدتيه مثلا انك تخرجيه او تشتريله حاجة لازم توفي بوعدك ولو اضطريتي انك متعمليش كده لازم تقولي لطفلك عذر مقنع علشان ميتعودش ان الكذب او الرجوع في الوعد شئ عادي.

2-شوية هدوء:
لو عرفتي ان ابنك عمل حاجة غلط او كذب عليكي في حاجة احتفظي بهدوئك وبلاش تواجهيه بعصبية او بأي كلام حاد او تهدديه لانه بكده هيستمر في سلوك الكدب عشان يحمي نفسه من العقاب الشديد,لاحظي انه طفل صغير واي عيب او غلط بيصدر منه ممكن يتعالج بسهولة بس محتاج شوية صبر وحكمة.

3-فهمي طفلك ان الغلط فرصة للتعلم:
في الحقيقة ان طفلك ميعرفش قيمة انه يتصرف صح ويتجنب الغلط لانه  لسة صغير علشان كده فهميه ان الغلط مش مشكلة كبيرة وانه مجرد فرصة للتعلم لكن المهم انه يتعلم منه وميكرروش,بالطريقة دي طفلك هيثق فيكي ومش هيخاف انه يصارحك بأي غلط عمله ولا هيكدب عليكي.

4-عرفي طفلك قيمة انه يقول الحقيقة:
خلي طفلك يعرف ان الصدق في الكلام والتعامل هيخليه  انسان محبوب وهيخلي الناس تثق فيه وتحبه اكتر،ده هيكون افضل بكتير من الافراط في توبيخه علي الكدب,احكيله حكايات شيقة تديله رسالة واضحة عن قيمة الصدق وان الكدب سلوك مش كويس.

5-امدحي ابنك علي قول الحقيقة:
لو في مرة مثلا طفلك اعترفلك انه كسر حاجة في البيت او جاب درجة وحشة في الامتحان اشكريه انه اعترفلك بالحقيقة وبرضه قوليله انك هتكوني مبسوطة منه اكتر لو صلح من سلوكه في المرات اللي جاية وشجعيه علي كده.

6-شوفي العلاج المناسب لسبب الكدب:
لو سبب الكدب اتعالج يبقي هتضمني ان ابنك مش هيكدب،لو مثلا طفلك بيكدب عشان جاب درجة وحشة في الامتحان يبقي عالجي الموضوع ده بإنك تشجعيه اكتر علي المذاكرة،لو سبب الكدب هو انه كسر حاجة او عمل حاجة غلط في البيت وخايف يعترف يبقي حاولي تشغليه بحاجة مفيدة وتعرفي هو بيتفرج علي ايه،يمكن بيتفرج علي حاجات بتعلمه السلوك العنيف.

7-اعرفي اصحابه بالاسم:
الطفل في مرحلة الحضانة وبعد دخوله المدرسة بيقعد مع اصحابه وقت طويل جدا وبيتأثر بيهم في حاجات كتير، علشان كده لازم تعرفي اصحاب ابنك كويس,لو اصحابه كويسين وبيقولوا الحقيقة هيتعلم منهم الصدق ولو بيكدبوا هيتعلم منهم الكدب.

Share.

Comments are closed.