اشترك
Buy Neuth France products

ابعد عن الدراما إللى حواليك

0

 

كلنا بنحب أصحابنا و أهلنا و بنحاول نساعدهم بقدر استطاعتنا بس أوقات كتير المساعدة دى بتكون عن طريق إنك تفضل تسمع لمشاكلهم و أحزانهم طول الوقت لكن إللى انت متعرفوش إن تدخلك فى المشاكل والنكد إللى يخص غيرك بشكل مبالغ فيه ممكن يأذيك انت شخصيا عشان كدة لازم تعرف إمتى تسمع للى حواليك و إمتى لازم تبعد عشان متأثرش بالسلب على صحتك النفسية ، اعرف معانا تفاصيل أكتر فى المقالة دى

معظم الأشخاص اللى بيحبوا يشتكوا معظم الوقت لو فكروا بشكل موضوعى هيكتشفوا إن رغم مشاكلهم و أحزانهم إلا إنهم مازالوا يمتلكوا كتير من النعم لكن هم مش مش شاعرين بدة و مهما حاولت تقنعهم هيضربوا بنصايحك عرض الحائط وهيستمروا فى الشفقة على أنفسهم و اجترار الشكوى و التذمر مرة ورا التانية و هم بكدة بيملوا الجو بطاقة سلبية فبيأذوا نفسهم و بيأذوك انت كمان لأنهم فى الأغلب بيكونوا مش لاقيين حد ينفسوا معاه عن غضبهم غيرك و ممكن لأنهم واثقين فيك جدا
و انت بتسمع لشخص تانى افتكر إن الهدف الأساسى هو إنك تساعد الشخص دة  إنه يخرج من مشكلته أو يتخلص من المشاعر السلبية إللى عنده فمينفعش إنك تسيبه يتكلم طول الليل و النهار عن مشاعره و إحساسه بالوحدة و الظلم وانت عارف كويس إن شكواه المستمرة هتزود من المشكلة و هتأذيه أكتر وهتأذيك انت كمان فى الوقت دة لازم تبعد
بالتأكيد منقدرش ننكر أهمية الفضفضة و التعبير عن المشاعر، دة شئ صحى ولازم نساعد بعض على كدة طالما الشخص ناضج كفاية انه يعرف جذور المشكلة و إزاى يحسن الموقف أو على الأقل يقلل من تأثيره على نفسيته
مشكلة معظم الناس هى عدم قدرتهم على فهم أنفسهم  أو مشاعرهم بشكل جيد فتلاقى الشخص بيتكلم كتير عن مشاكله لكن يمكن مش قادر يفهم إن فى أفكار أو ذكريات أو مشاعر معينة هى إللى مزودة حدة المشكلة عنده و بالتالى مش بيقدر يعبر عنها
لو قابلك موقف شبه الموقف دة متتكسفش إنك تعتذر عن الاستمرار فى الاستماع للشخص دة ، ممكن تشوف إنه تصرف غير لائق لكن الحقيقة إن دى ممكن تكون خدمة كويسة تقدمها للشخص كثير الشكوى و التذمر لأنه ممكن وقتها يشعر إنه لازم يغير من ردود أفعاله و يحاول ياخد خطوة إيجابية ، اكتفى بإنك تقوله ( أنا أسف مش هقدر أكمل فى الأمر دة ) بدون تفسير أو شرح للأسباب ، لكن خليك مستعد لأنك ممكن تتعرض لابتزاز عاطفى أو تسمع عبارات مش لطيفة ، اتحمل كل دة فى صبر ، من الأفضل إنك تتضايق وتتحمل عبارات سلبية لدقايق قليلة من إنك تكون مستودع لأحزان وشكوى شخص أخر رافض أى حلول غير إنه يكون ضحية

لو عايز أساعد شخص مكتئب أعمل إيه؟

  • أهم طريقة تقدر تساعد بيها الشخص الحزين و المكتئب هى إنك تسمع لمشكلته و مشاعره فى البداية و بعدين تبدأ تدور معاه على حل مناسب للمشكلة أو طريقة لتقبل الأمر ، وحاول دايما تبعده عن لعب دور الضحية
  • ساعده على التغيير ، التغيير الحقيقى هو الحل ، فى وقت للكلام و الدموع و الفضفضة و وقت للحلول و التغيير ، ساعدهم ياخدوا خطوة ايجابية و ميستمروش فى الحزن و الألم والشكوى
  • حاول تشتت انتباهه عن المشكلة ممكن تشركه فى أنشطة جديدة أو تعرفه على أشخاص جدد ، تخرجوا فى مكان جديد و تتكلموا فى مواضيع مسلية
  • أخيرا حاول تشجعه إنه يطلب المساعدة من شخص متخصص ، دور معاه على شخص موثوق فيه وشجعه على الاستمرار فى رحلة التغيير

Share.

Comments are closed.