اشترك
Buy Neuth France products

إزاى تقلل ضرر الوجبات السريعة على جسمك

0

بالنسبة لكتير من الناس الخروج و الأكل فى المطاعم هو فرصة للراحة والتسلية والاستمتاع مع العيلة والأصحاب ، و بالنسبة لناس تانية هى فرض بسبب ظروف الشغل أو عدم توفر وقت للطبخ فى البيت ، لكن لو راقبت وزنك أو حتى كنت شخص مهتم بالأكل الصحى هتكشتشف إن تناول الوجبات السريعة هو عادة سيئة لازم تتغلب عليها . الخبر الكويس إن عدد المطاعم المهتمة بتقديم وجبات صحية أصبح فى زيادة وأصبحت كتير من المطاعم بتهتم بوجود قسم للوجبات الصحية أو قليلة السعرات الحرارية فى المنيو الخاص بها

 

ليه لازم تهتم بتقليل ضرر الوجبات السريعة على جسمك :

  • لأنها تسبب السمنة :

بسبب إنها تحتوى على كم كبير جدا من السعرات الحرارية والدهون الضارة إللى بيتم تخزينها فى الجسم وخصوصا فى منطقة البطن و الأرداف

  • تزيد من خطر الإصابة بمرض السكر :

بسبب إضافة كتير من المحليات الصناعية للحصول على الطعم المطلوب مما يؤدى لرفع مستوى السكر فى الدم

  • تزيد من خطر الإصابة بمرض ضغط الدم :

يوجد ارتباط بين تناول الوجبات السريعة والإصابة بارتفاع ضغط الدم أيضاً وذلك لأن المعالجة والعمليات التي تخضع لها هذه الأطعمة تفقدها الكثير من مكوناتها الطبيعية مما يؤدي إلى زيادة خطر الإصابة بمرض ارتفاع ضغط الدم

  • الوجبات السريعة تزيد من التوتر :

الوجبات السريعة تسبب التوتر وتزيد من العصبية، وبعض الاغذية والمشروبات ترفع هرمونات التوتر بشكل مباشر في الجسم مثل الكولا والمشروبات الغازية والوجبات السريعة المختلفة بشكل عام و الغنية بالأملاح بشكل خاص

نصائح لتقليل ضرر الوجبات السريعة على جسمك :

  • خطط مسبقا هتاكل إيه وفين :

هيكون أسهل عليك إنك تختار اختيارات صحية للوجبة الخاصة بيك لو كنت مخطط مسبقا انت هتاكل إيه و فين ، فعنصر المفاجأة ممكن يؤدى للتردد فى نوع الوجبة وبالتالى فرصة اختيار وجبة أكثر ضررا هتكون أكبر

 

  • متطلبش وجبة وانت فى قمة الجوع :

لو وصلت للمطعم أو طلبت وجبة و انت فى قمة الجوع فى الأغلب هتكون اختياراتك غير صحية

  • حدد الحصة إللى انت محتاجها :

كتير من المطاعم بتقدم وجبات ضخمة لدرجة تكفى شخصين أو ثلاثة ، و كتير من الناس بتستمتع بالأكل حتى بعد ما توصل لمرحلة الشبع . فكر بس فى الحصة الضرورية إللى انت محتاجها علشان تشبع وتجنب الأكل بعد ما توصل لمرحلة الشبع . و لتجنب المشكلة دى ممكن تطلب كميات صغيرة من الأكل أو تشاركها مع شخص تانى أو تحتفظ بها لوقت تانى

  • اختار وجبات تحتوى على تحتوى على عناصر متنوعة :

زى الفواكه أو الخضروات واللحوم أوالدواجن أو الأسماك ، الوجبات السريعة غالبا تفتقر إلى التنوع والاهتمام بالخضروات أو الفواكه ، حصولك على وجبة متنوعة العناصر الغذائية ممكن يساعدك تحصل على وجبة أقل ضررا لصحتك

  • استبدل الدقيق الأبيض بدقيق القمح الكامل :

استبدل الدقيق الأبيض فى الوجبة بدقيق القمح الكامل . خلى اختيارك من الخبز أو المكرونة أو الأرز أو المعجنات مصنوع من دقيق القمح الكامل

  • استبدل المشروبات الغازية بالماء أو لبن قليل الدسم :

اطلب لبن قليل أو خالى الدسم فى حالة توفره . اللبن قليل أو خالى الدسم يحتوى على نفس كمية الكالسيوم والعناصر الغذائية الأخرى الموجودة فى اللبن الكامل الدسم ولكن بدهون وسعرات حرارية أقل . ممكن تطلب ليك ولأطفالك لبن أو زبادى قليل الدسم محلى بالفواكه . فى حالة عدم توفر لبن قليل الدسم يفضل تكتفى بالماء

  • ابتعد عن الأطعمة المحتوية على كمية عالية من الدهون المشبعة ، السكريات ، أو الصوديوم :

اختار أطعمة ومشروبات تحتوى على نسب قليلة من الدهون والسكريات والصوديوم ، اقرا مقادير الوجبات والمشروبات بعناية و طريقة تحضيرها فى حالة ذكرها فى المنيو الخاص بالمطعم أو اطلب معرفة طريقة تحضير الوجبة من المطعم نفسه ، و ركز على الوجبات المطبوخة على البخار أو المشوية أو المسلوقة ، ابتعد عن الأطعمة المحتوية على زبدة أو صوص أبيض أو الأطعمة المقلية أو المضاف لها جبن كامل الدسم

  • فى أثناء السفر أو الرحلات اختار وجبات سريعة محفوظة و محكمة الغلق بحيث يكون من الصعب تلفها فى الحر أو الرطوبة أو بسبب العوامل البيئية المختلفة . ممكن تختار وجباتك من الأطعمة المعلبة أو المعجنات لأنها بتكون الأكثر تحملا لظروف الجو

اتباعك للنصايح المكتوبة فى المقالة هيساعدك فى تقليل أضرار الوجبات السريعة على جسمك لكن دة مش معناه أبدا الاعتماد على الوجبات السريعة فى الحياة اليومية ، اهتمامك بصحتك يستلزم منك تقضى وقت أطول فى المطبخ لتحضير وجباتك بنفسك للتأكد من مكوناتها ووصول قيمتها الغذائية لجسمك

Share.

Comments are closed.