اشترك
Buy Neuth France products

إزاى تتعامل مع الضغوط؟

0

كلنا بتقابلنا ضغوط كتيرة فى الحياة و أوقات بنتمنى لو إن المصاريف و الديون تختفى أو اليوم يبقى أطول شوية لكن دة للأسف مش هيحصل ، بيتك و شغلك هيفضلوا محتاجين منك وقت طويل و المصاريف مش هتقل و اليوم مش هيبقى أطول ، بس الخبر الكويس إنك تقدر تتحكم فى كل دة ، هتقدر تتعامل مع الضغوط لو أخدت بالك كويس من أفكارك ومشاعرك و جدول يومك و طريقة تعاملك مع المشكلات

اكتشف أسباب الضغوط فى حياتك :
بداية التعامل الصحيح مع الضغوط هو معرفتك بمصدرها و أسبابها ، الأمر دة مش سهل زى ما انت متخيل ، الأسباب الحقيقية وراء الضغوط و التوتر إللى بتقابلهم فى حياتك ممكن تكون مش واضحة بالنسبة لك ، يعنى ممكن تكون شايف إن سبب توترك هو المسئوليات إللى عليك فى الشغل لكن ممكن يكون السبب الحقيقى مش مسئوليات الشغل لكن تأخرك عن أداء واجباتك  و تأجيلك المستمر لمهام شغلك
عشان تقدر تعرف الأسباب الحقيقية للضغوط فى حياتك اعرف عاداتك و تصرفاتك و أعذارك
لو مقدرتش تتعرف على مسئوليتك تجاه الضغوط إللى بتقابلك مش هتقدر تسيطر عليها أو تتعامل معاها بشكل مناسب

اعرف إزاى بتتعامل مع الضغوط إللى بتقابلك :
فكر فى الطريقة إللى بتتعامل بيها مع الضغوط إللى بتقابلك ، واعرف هل هى طريقة صحية ومناسبة أو لأ ، للأسف كتير من الناس بيتعاملوا مع الضغوط بطريقة تؤدى لتفاقمها

أمثلة للطرق غير الصحية فى التعامل مع الضغوط :

  • التدخين أو شرب الكحوليات
  • الإفراط فى تناول الطعام أو عدم الرغبة فى الأكل
  • الجلوس أمام التليفزيون والكمبيوتر لساعات طويلة
  • النوم لوقت طويل
  • الابتعاد عن الأسرة و الأصدقاء و الأنشطة الطبيعية فى الحياة
  • التنفيس عن الغضب بطرق عنيفة زى ممارسة العنف الجسدى مع الغير أو الإيذاء اللفظى

اتعلم طرق صحية و مناسبة تساعدك على التحكم فى الضغوط :
فى طرق كتيرة تساعدك على التحكم فى الضغوظ المختلفة لكن كل الطرق بتحتاج منك شوية تغيير و مجهود، دايما فكر إنك محتاج إما تغير الموقف أو رد فعلك تجاهه فى حالة عدم قدرتك على تغييره

الطرق المختلفة للتعامل مع الضغوط :
لأن كل شخص فينا مختلف فى استجابته للمواقف و الضغوط إللى بتقابله عشان كدة مفيش طريقة واحدة نقدر نساعدك بيها لكن هنعرفك أكتر من طريقة عشان تقدر تختار الطريقة المناسبة لشخصيتك و المواقف إللى بتتعرضلها

  • اتعلم تقول لا :
    اعرف حدودك كويس فى التعامل مع الناس و متحملش نفسك فوق طاقتها
  • تجنب الناس إللى بيسببولك ضغوط :
    لو بتتعامل مع أشخاص بيسببولك ضغوط حاول تتجنبهم أو تقلل الوقت إللى بتقضيه معاهم
  • حاول تتحكم فى بعض الظروف :
    لو بتتوتر من متابعة الأخبار حاول تكتفى بالعناوين فقط بدون التعمق فى التفاصيل ، لو الطريق زحمة ممكن تشوف طريق تانى حتى لو أطول شوية و لو طلبات البيت بترهقك ممكن تطلبها أون لاين
  • تجنب الموضوعات الساخنة :
    لو بتتوتر من التحدث فى الأمور الدينية أو السياسية ابتعد عن الحديث عنها مع الناس بقدر الإمكان ، حاول متفتحش أى نقاشات انت عارف من البداية إنها بتسببلك توتر
  • رتب جدول يومك و حاول تقسم مهامك بين المهم فالأهم
  • عبر عن مشاعرك وعن غضبك بدلا من الكتمان و الكبت
  • خليك حازم :
    اتعامل مع مشاكلك بحزم و حاول دايما تعمل حساب المشكلات عشان تتجنبها من قبل ما تحصل
  • اتعلم إزاى تدير وقتك :
    لو عندك امتحان مهم متأجلش المذاكرة لأخر وقت ، ولو عندك مناسبة مهمة متأجليش التجهيز لأخر يوم قبل الحفلة ، لو متعاملتش مع وقتك صح هتشعر بتوتر و ضغط شديد فى النهاية
  • حاول تنظر للمشاكل و الضغوط إللى بتقابلك بنظرة مختلفة :
    حاول تبعد عن النظرة السلبية للأمور يعنى فى زحام الطريق ممكن تعتبر دى فرصة إنك تسمع الموسيقى المفضلة عندك أو للتفكير و التأمل أو الصلاة و الدعاء ، و حاول انك تشوف الجانب الإيجابى فى كل موقف بيقابلك ، لو بتمر بفترة امتحانات بتضغط على أعصابك افتكر إن عندك مواهب و ذكاء وانك تقدر تعدى من الفترة دى بنجاح ، لو بتتعامل مع شخص مستفز و بيعصبك طول الوقت اعتبرها فرصة عشان تتعلم الصبر
  • اتبع نمط حياة صحى :
    العب رياضة بانتظام واهتم بتناول الأكل الصحى و ابتعد عن التدخين و إدمان الكحول و المخدرات

 

Share.

Comments are closed.