اشترك
Buy Neuth France products

أكتر 5 أطعمة مغذية ممكن تاكلها

0

فى المقالة دى هنقدملكم أكتر 5 أطعمة مفيدة لازم تهتموا بتناولها وانها تكون جزء من الأطباق الموجودة على سفرتكو تابعوا معانا عشان تعرفوا أكتر

السبانخ :
كتير من الناس بيمدحوا فى السبانخ لأنها غنية بالعناصر الغذائية المفيدة و كمان متوفرة فى كل مكان وتقدر تلاقيها بسهولة و سعرها معقول جدا ، من أهم فوايد السبانخ قدرتها على إمدادك بالطاقة و الشعور بالشبع بدون ما تحتاج لأطعمة بسعرات حرارية عالية ، بالإضافة لغنى الأطعمة النباتية بمضادات الأكسدة المهمة جدا لصحتك و حمايتك  من الأمراض ، الأطعمة النباتية و على رأسها السبانخ بتغذى و تنعش كل خلايا جسمك

السالمون :
لما يتعلق الأمر بالقيمة الغذائية للأسماك ، السالمون هو الملك ، عنصر الأوميجا-3 و نسبة  البروتين العالية إللى بيحتوى عليها السالمون هى السبب فى كدة ، كتير من الناس بيحبوا السالموا لأنه خفيف على المعدة و طعمه كويس و خالى من الزفارة الموجودة فى معظم أنواع الأسماك التانية ، السالمون مفيد جدا لبناء العضلات و لصحة الدورة الدموية دة بالإضافة لفوايده فى تقوية الذاكرة و تقوية الجلد و الشعر و تحسين مظهرهم ، عشان تحصل على القيمة الغذائية الكاملة للسالمون ابتعد عن السالمون المدخن و ركز على تناول السالمون الطازج

البروكلى :
البروكلى هو من أكثر الخضروات إللى بتتمتع بقيمة غذائية عالية ، بيستخدم فى كتير من الوصفات و خصوصا الأطباق الجانبية و المقبلات ، أفضل طريقة لتناول البروكلى هى الطهى على البخار للحفاظ على طعمه و قيمته الغذائية ، و من أهم فوايد البروكلى إنه غنى بالألياف المهمة لعملية الهضم و يعتبر مصدر هام للحصول على الكالسيوم ، كمان البروكلى بيحتوى على الحصة إللى انت محتاجها من فيتامين C إللى بيزود مناعتك ضد الأمراض المختلفة  ، و فيتامين K و هو فيتامين مفيد لتقوية العظام

اللوز :
أهم ميزة فى اللوز إنك تقدر تتناوله كوجبة خفيفة فى أى وقت و فى أى مكان فى الشغل أو فى النادى أو فى المواصلات أو فى رحلة من غير ما تشيل هم ريحة الأكل أو المكان إللى هتحطه فيه ، حفنة من اللوز بتديك شعور بالشبع و الطاقة ، المدربين الرياضيين بينصحوا بأكل اللوز للأشخاص المهتمين ببناء عضلاتهم، لكن اللوز ليه فوايد تانية زى إنه بيساعد على تقليل الكوليسترول السئ و بيحمى من الإصابة بأمراض القلب و بيساعد على تحسين وظائف الدماغ ، لكن تجنب تناول اللوز المملح و الملئ بالزيوت

البطاطا الحلوة :
على الرغم من رخص ثمنها ، إلا إنها طعام مثالى للأشخاص المهتمين باتباع نظام غذائى صحى ، البطاطا المشوية من الوجبات الخفيفة المشهورة فى بلدنا ، لكن ممكن كمان إنها تدخل فى وصفات مختلفة بسبب طعمها اللذيذ ، البطاطا الحلوة فوايدها كتير جدا لكن من أهمها دورها فى الحماية من الأزمات القلبية ، وتحسين مظهر البشرة و زيادة نضارتها ، زيادة كفاءة الجهاز المناعى و المساعدة على الشعور بالراحة و الاسترخاء ، وهى غنية بمضادات الأكسدة و بتساعد على الشعور بالشبع

 

Share.

Comments are closed.