اشترك
Buy Neuth France products

أفكار مفيدة للستات إللى مش بيحبوا التمارين الرياضية

0

هل بتكرهى التمارين الرياضية و شايفاها مملة و متكررة و بتزود الأعباء و الواجبات إللى عليكى طول اليوم ؟ إنك تحافظى على لياقة بدنية و وزن مثالى شئ صعب و بيكون أصعب لو كنتى من الناس إللى مش بيفضلوا إنهم يمارسوا الرياضة أو يخلوها روتين يومى ممكن تجربى فكرة من المقالة دى علشان تساعدك إنك تستمتعى بالرياضة و تنتظمى فيها

رياضة الملاكمة :

متستغربيش ممكن رياضة الملاكمة تكون فكرة غريبة أو مخيفة بالنسبة لك ، لكن ممكن تلاقى فصول لتعليم الملاكمة مش بتتضمن ملاكمة أو ضرب شخص تانى لكن بيتم ممارسة الرياضة فيها باستخدام كيس الملاكمة (Boxing bag    ) ، لو مكنيتش بتحبى الملاكمة كرياضة فهى على الأقل فرصة ليك للتنفيس عن ضغوط حياتك اليومية و كمان هتساعدك على الحصول على لياقة بدنية مكثفة

الانضمام لفريق رياضى :

الانضمام لفريق رياضى ممكن يكون محفز قوى ليكى عشان تلتزمى فى ممارسة الرياضة ، بالإضافة لأنها هتساعدك على التفاعل مع الناس و إنك تكونى اجتماعية أكتر زى إنك تتعرفى على أصدقاء جدد أو حتى تقوى علاقتك بأصدقائك و بعيلتك ، ممكن تدورى على نادى قريب منك بيوفر تعليم و ممارسة بعض الرياضات الجماعية تكونى معجبة بيها و عندك شغف لتعلمها و ممارستها زى كرة القدم أو كرة السلة أو كرة اليد ، اقترحى على أصدقائك أو عيلتك الفكرة و اشتركوا فى فريق واحد دة هيزود استمتاعك بالرياضة أكتر

رياضة التجديف :

رياضة التجديف هى رياضة ممتازة لتقوية عضلات النصف العلوى من الجسم بصفة خاصة ، لكن يمكن ممارسة رياضة التجديف يخليكى مشتتة فى التأمل فى المياه و المناظر الطبيعية المختلفة و يمكن تنسى إنك بتلعب رياضة . ممكن تستغلى فرصة التجديف وتعتبريها نزهة ليك مع أطفالك أو أصحابك

اليوجا :

ممارسة اليوجا هدفها تحسين الصحة الجسدية و النفسية ، وبالتالى مش بس جسمك يكون أفضل ولياقتك البدنية أعلى لكن كمان اليوجا بتديكى قوة و طاقة نفسية تساعدك على مواصلة حياتك بشكل كويس جدا ، لكن خلى بالك إن فى أنواع و مستويات مختلفة لليوجا لازم تختارى مستوى مناسب لقدرتك الجسمانية على تحمله

رياضة المشى :

مين يقدر يقاوم التمشية فى جو جميل ؟! لو حاسة إن التمشية شئ ممل حاولى إنك تمشى بخطوات أسرع أو تسمعى أغانى فى الطريق أو تاخدى حيوانك الأليف معاكى فى الطريق . انتهزى أى فرصة للتمشية سواء للبقال أو للتسوق أو حتى مكان شغلك لو كان قريب كفاية . دورى على شوارع حلوة و مريحة لعينك

السباحة :

ممارسة رياضة السباحة و خصوصا فى فصل الصيف بيدى شعور بالمتعة و الانتعاش ، مش بس كدة لكن السباحة من أكتر أنواع الرياضة إللى بتقوى كل عضلات الجسم ، تعلمك للسباحة هيفرق معاكى كتير من ناحية زيادة لياقتك البدنية و الراحة النفسية من ضغوط الحياة الكتيرة و هتجدد طاقتك وتخلصك من الإكتئاب

 

 

ركوب الدراجة :

ركوب الدراجة أصبح منتشر على مستوى العالم كوسيلة مواصلات صديقة للبيئة وللإنسان و ليها فوايد كتير زى إنها بتحسن كل وظايف الجسم و بتساعدك على الحصول على لياقة بدنية عالية ، بتنشط الدورة الدموية وبتساعد على فقد حوالى 300 سعر حرارى فى الساعة بالإضافة لأنها بتزود ثقتك بنفسك و بتمنحك شعور بالقوة و السيطرة ، جربى ممارسة رياضة ركوب الدراجة فى البداية فى أماكن فاضية عشان تتجنبى أى إصابة محتملة

نط الحبل :

نط الحبل كان من الألعاب المفضلة لينا فى فترة الطفولة ، كنا بنستمتع بيها جدا و احنا بنعمل مسابقات مين هيقدر ينط الحبل وقت أطول من غير ما يقع ، الدراسات أثبتت إن نط الحبل مش بس لعبة ممتعة لكن ليه كمان فوايد جسمانية كتيرة جدا فهو وسيلة رائعة لحرق السعرات الحرارية و تقوية عضلات الجسم بصفة عامة ، نط الحبل رياضة رخيصة جدا و ممكن تمارسيها فى كل مكان و فى أى وقت لأنك مش محتاجة غير لحبل مخصص للرياضة دى

الرقص :

متستغربيش إن كتير من الراقصات بيتمتعوا بجسم متناسق و لياقة بدنية عالية دة مش جاى من فراغ و لا من ممارسة تمارين معينة ، الرقص بيزود من لياقتك البدنية ومرونة جسمك و بيقلل الضغوط النفسية و بيحميكى من أمراض القلب و ضعف الدورة الدموية ، متكتفيش إنك تتفرجى على الراقصات فى التليفزيون أو برامج الرقص المختلفة لكن حاولى انتى كمان تستمتعى بممارسة الرياضة دى ، اختارى الموسيقى المفضلة عندك و نوع الرقص المفضل عندك واستمتعى بلحظات هتكون أجمل لحظات فى روتينك اليومى

Share.

Comments are closed.