اشترك
like Sofy on Facebook

أطفالنا سر فرحتنا

0

لأن الاطفال مهمين عند اسرهم وعند الدنيا كلها وهما سر فرحتنا وسعادتنا اتعمل يوم 20 نوفمبر من كل سنة علشان يحتفل بيه العالم كله بالاطفال  . وكمان علشان اطفال النهاردة هما مستقبل بكرة فأحنا من خلال الموضوع ده هنساعدكم وهنعرفكم ازاي تهتموا بأطفالكم وصحتهم وازاي تحموهم من الامراض ومش بس كده،هنعرفكم كمان على الجانب النفسى لأطفالكم وازاي تحموا أولادكم من المشاكل النفسية.

ازاي تهتمي بصحة طفلك؟

من ناحية الوجبات الغذائية:
-بلاش تضغطي علي طفلك انه ياكل غصب عنه لكن حاولي تجهزيله الوجبة بشكل يشده.
-وجبة الفطار مهمة جدا للطفل لانها بتديله الطاقة اللي بتساعده طول اليوم خصوصا ايام المدرسة وضروري جدا انها متخلاش من الكالسيوم الموجود في الجبنة والبيض واللبن .ومهم جدا ان الوجبات يكون فيها بروتين وده موجود في الجبنة واللبن والبيض والسمك والتونة واللحوم والبقوليات.
-الخضروات مهمة جدا للطفل لانها غنية بالالياف . لو طفلك مش بيحب الخضروات حاولي تنسقيله طبقه بشكل جذاب يخليه يحب اكلها
ومن الخضروات المهمة جدا للطفل الجزر لانه بيقوي نظره وده بيساعده جدا في التحصيل الدراسي غير ان لون الجزر بيشد الطفل.
-فيتامينc(موجود في البرتقال والليمون والجوافة) مهم جدا لمناعة طفلك ضد الامراض واللي اكترها انتشار هي امراض البرد في الشتا.
-اكيد الطفل ممكن يجوع بين الوجبات التلاتة عشان كده بيحتاج بعض الاكلات الخفيفة اللي طعمها لذيذ زي:
-الفواكه الطازجة وممكن تقطعيها بطريقة تشد الطفل عشان يحبها اكتر.
-زبادي بالفواكه وممكن تعمليه في البيت بنفسك.
-كرواسون بالجبنة او الشوكولاتة.
-بطاطا مشوية.
-بيتزا صغيرة وممكن تعديها انتي في البيت وتشركي طفلك معاكي.

احذري من:
-لازم تجنبي طفلك مشروبات المياة الغازية بأنواعها لانها غير انها عالية السعرات الحرارية كمان بتؤدي لتسوس الاسنان وبتخليها صفراء وغير صحية وكمان بتجيب هشاشة العظام. يفضل استبدال مشروبات المياة الغازية بالعصائر الطازجة.
-بلاش الوجبات السريعة كتير لانها مضرة ونظافتها مش مضمونة وبتصيب بالسمنة.

ازاي تحمي طفلك من الاصابة بالامراض:
-معروف ان الاطفال مناعتهم اضعف من غيرهم عشان كده بيكونو معرضين اكتر من غيرهم للاصابة بالامراض وخصوصا في اوقات الاختلاط بغيرهم من الاطفال في الحضانة والمدرسة او حتي في النادي. وعشان تحمي طفلك من الامراض لازم تركزي علي:
-النظافة الشخصية لطفلك:
-لازم تهتمي بالنظافة الشخصية لطفلك خاصة بعد الرجوع للبيت مباشرة لانه بيكون قضي يوم طويل برة البيت واختلط بناس كتير
ولمس حاجات كتير نظافتها مش مضمونة.
-النظافة الشخصية مش بس لجسم الطفل لا كمان لكل حاجة تخصه(ملابسه ، العابه ،ادواته المدرسية,العابه،جهاز الكمبيوتر الخاص بيه
واي حاجة بيستعملها.)
-يفضل بلاش الاكل الجاهز لان نظافته مش مضمونة
1- حماية الطفل من نزلات البرد في الشتا:
-لازم تلبسيه ملابس مناسبة لحالة الطقس.
-الاكل اللي بيقوي المناعة مهم جدا للطفل خصوصا فيتامينc  اللي بيقي من نزلات البرد
-لو طفلك اصيب بأي دور برد يفضل انه يرتاح في البيت عشان يشفي بسرعة ومتحصللوش مضاعفات.

2- مشاكل الظهر عند اطفال المدارس:
-يفضل ان طفلك ميشيلش شنطة تقيلة لانها بتؤلم الظهر وبتسبب مشاكل في العمود الفقري والكتف عشان كده يفضل ان الشنطة تكون بعجل لانها افضل من اللي بتتشال علي الظهر.
-راعي ان جلسة طفلك قدام الكمبيوتر واثناء المذاكرة تكون صحية بحيث ان ظهره يكون مستقيم.

3- ازاي تعالجي مشكلة النحافة عند طفلك:
-لو النحافة عند طفلك مصحوبة بإسهال ممكن يكون ده مؤشر ان عنده ديدان او طفيليات لذلك مهم جدا ان يتم عمل التحاليل اللازمة
-اشتركي مع طفلك في اكل الوجبات لان ده بيشجعه علي الاكل.
– عوديه علي الاكل في مواعيد منتظمة.

4- ازاي تعالجي مشكلة السمنة عند طفلك:
-ساعديه انه يقلل من الجلوس قدام الكمبيوتر واشغليه بحاجات تانية فيها حركة.
-عوديه انه يقلل من الوجبات السريعة واكل الشارع والمياة الغازية واستبدلي ده بإنك تعمليله الوجبات اللي بيحبها في البيت.

المشاكل النفسية عند الطفل:
* اسباب المشاكل النفسية عند الطفل:

-وجود مشاكل بين الوالدين اكيد بيضر بنفسية الطفل وممكن يصيبه بامراض عضوية زي التبول اللاارادي.
-التعنيف الزيادة بسبب ضعف مستواه الدراسي او اي حاجة تانية خصوصا التعنيف اللي فيه ضرب او شتيمة.
-انشغال الوالدين عن الطفل فترات طويلة اكيد بيضر بنفسيته وممكن يخليه يتعود علي سلوكيات ضارة.
-المبالغة في الاوامر والنصايح خصوصا لو كان الاسلوب فيه تعنيف بيضايق الطفل وممكن يوصله للتمرد او لضعف شخصيته

* ازاي تساعدو اطفالكم انهم يكونو اصحاء نفسيا وفعالين في مجتمعهم:

-راعو دايما ان جو البيت يكون فيه مودة وحوار مشترك متحضر بين الوالدين وبينهم وبين الاطفال.
-ابعدو عن التعنيف الزيادة وممنوع تماما الضرب.لو طفلك ارتكب غلط معين حاول تعرف اسبابه وتعالجها بحكمة.
-نظمو مواعيد شغلكم ورتبو مسئولياتكم بحيث ان طفلكم يكون من اولوياتكم وأكدوله ده .
-اسلوب المكافئة للطفل علي اي حاجة صح يعملها بيكون له دور ايجابي في تشجيعه علي العادات الايجابية.
-اديله النصايح بأسلوب لطيف وفهمه انت ليه بتقوله كده عشان يفهم ان ده مش امر لمجرد الامر.
-هيئه كويس لاي تغير جديد في حياته زي دخول المدرسة او استقبال الاسرة لأخ جديد.
-بلاش توعده بحاجة متقدرش عليها او تنسي وعودك معاه او تخلفها لانه بيفقد الثقة فيك .

* بعض السلوكيات الخاطئة وعلاجها:
-الشتيمة:ممكن طفلك يلقط شتيمة او لفظ مش كويس من المدرسة او الشارع او التلفزيون او حتي من البيت.
-لو سمعت طفلك بيشتم بلاش تعنفه. فهمه بحكمة ان السلوك ده مش حلو وعالج ده بإنك تراقب نوعية اصحابه ونوعية الحاجات اللي
بيشاهدها في التلفزيون وبلاش تشتم عشان تكون قدوة لطفلك.

-الكذب:الطفل ممكن يلجأ للخديعة او انه يخبي عنك حاجة . لو لاحظت ان طفلك بيكذب بلاش تعنفه لكن عالج سبب الكذب بإنك تطمنه انك بتحبه ومش ممكن تؤذيه وفهمه ان اي توجيه بتقوله بيكون عشان مصلحته.ولو انت بتكدب بلاش العادة دي لان الطفل بيقلد.
-الانانية
: في حالة الطفل الاناني عود طفلك انه يكون فعال علي الاقل في البيت بإنه يرتب سريره اول ما يصحي ويجهز شنطته بنفسه ويساعد والدته في الترتيب للاكل ولو عنده اخ صغير يساعدك في اموره الشخصية  وفي المدرسة بإنه يكون متعاون مع اصحابه في الانشطة المدرسية.ولو حسيت ان طفلك بدأ يكون متعاون كافأه عشان يستمر
-الانطواء:لو طفلك منطوي حاول تديله وقت اطول تقضيه معاه وابعد عن تعنيفه واشركه مع اللي حواليه في حاجة بيحبها.

Share.

Comments are closed.