اشترك
like Sofy on Facebook

أطعمة تساعدك على النوم

0

من المهم جدا إنك تحصل على قدر كافى من النوم العميق و المنتظم ، ممكن تكون عارف بعض المشروبات إللى ممكن تساعدك على السهر زى المشروبات المحتوية على الكافيين زى مشروبات الكولا و القهوة ، لكن كمان فى أطعمة تحتوى على فيتامينات و معادن  ممكن تساعدك على النوم و تعالجك من الأرق ، اعرفوا معانا إيه هى أهم الأطعمة إللى تساعدك على النوم

الكريز :

مش لازم تاكل الكريز قبل ما تنام مباشرة عشان تقدر تنام كويس ، ممكن تحتفظ بزجاجة من عصير الكريز فى التلاجة و تشربها قبل ما تنام بساعات قليلة ، و بكدة هتحفز جسمك على زيادة هرمون الميلاتونين المسئول عن دورات النوم  والاستيقاظ بطريقة طبيعية ، بمجرد شعورك برغبة النوم متقاومش الشعور دة و روح نام مباشرة

الجريب فروت :

ثمرة الجريب فروت تحتوى على مادة الليكوبين وهى مادة مضادة للأكسدة قادرة على تحسين نظام نومك مش بس كدة لكن مادة الليكوبين قادرة على تقليل خطر الإصابة بأمراض القلب و السرطان و لها تأثير مضاد للشيخوخة و كمان بتساعد على خفض الوزن

اللوز :

اللوز غنى بالعناصر الغذائية المهمة لجسمك ، قدرة اللوز على مساعدتك على الحصول على نوم هادئ و مريح هو واحد من فوايد اللوز الكتيرة جدا ، اللوز يحتوى على عنصر الماغنسيوم إللى بيساعد جسمك على الاسترخاء و على النوم لوقت أطول ، اللوز كمان بيحتوى على دهون غير مشبعة تساعدك على اتباع نظام غذائى صحى وعلى الحصول على عضلات لو كنت بتلعب تمارين للغرض دة

الطماطم :

مادة الليكوبين الموجودة فى الطماطم بتخليها اختيار كويس لوجبة العشاء ، ويفضل تناولها مطبوخة عشان تطلق المواد المغذية الموجودة فيها ، على الرغم من أهمية مادة الليكوبين إلا إن كتير ميعرفوش عنها فهى بتحميك من بعض أنواع السرطان و أمراض القلب ، ابدأ بأكل الطماطم لو مكنتش متعود على أكلها

الزبادى :

الكالسيوم الموجود فى الزبادى و منتجات الألبان الأخرى بيساعد فى تقليل التوتر إللى بتتعرض له طول اليوم وبالتالى هتقدر تنام أسرع من غير ما دماغك تفضل تودى و تجيب قبل ما تنام ،  كل منتجات الألبان بتساعد على انتاج البكتيريا المفيدة لجهازك الهضمى لكن البكتيريا النافعة من الصعب انها تشتغل فى وقت النوم لكن فى حالة الزبادى الأمر مختلف لأنها المنتج الوحيد إللى جهازك الهضمى يقدر يتحمله قبل النوم

البلح :

من الأطعمة المفيدة جدا لعلاج الأرق لأنه بيشتغل بطريقة مزدوجة فهو يحتوى على مادة التربتوفان و هى من المواد المسئولة عن إنتاج السيروتونين المسئول عن تحسين المزاج و الشعور بالسعادة و كمان بيحتوى على كربوهيدرات سريعة المفعول إللى بتزود من مفعول مادة التربتوفان لانتاج السيروتونين ، تناول البلح قبل ميعاد النوم بساعة ، الديك الرومى و المكسرات و الحبوب و منتجات الألبان من الأطعمة الغنية بمادة التربتوفان

الشاى :

شرب الشاى من الطرق الشائعة جدا للتخلص من الأرق وفى أنواع معينة من الشاى بتساعدك على النوم بشكل أفضل زى شاى الكاموميل وهو نوع من أنواع  الشاى المشهورة بالمساعدة على الاسترخاء ، كمان الشاى بالنعناع من المشروبات إللى ممكن تساعدك على النوم بعمق

الموز :

الموز يعتبر وجبة خفيفة ممتازة تقدر تاخدها معاك فى أى مكان و كمان مصدر جيد للحصول على الطاقة ، وكمان الموز هيساعدك على الشعور بالنعاس لأن جسمك بيظبط نفسه على ساعتك البيولوجية فى مواعيد النوم والاستيقاظ فلو حصلت على العناصر الغذائية إللى جسمك محتاجها هتساعد نفسك على النوم فى الوقت المظبوط و إن يكون عندك طاقة لباقى اليوم

مش بس الأطعمة المذكورة فى المقالة ممكن تساعدك على الحصول على نوم هادئ و مريح لكن فى أطعمة أخرى ممكن تعمل كدة زى البروكلى و البطيخ و الفراولة و الحبوب الكاملة و الأسماك

Share.

Comments are closed.