اشترك
Buy Neuth France products

أخطاء بتعمليها بتخليكى مش بتخسى

0

تعبتى من الرياضة و الانتظام فى صالات الجيم و الحرمان من الأكل ولسة زى ما انتى مش بتخسى ولا عضلاتك بتقوى ؟ أكيد مش الحل إنك تبطلى تمارسى الرياضة أو توقفى النظام الغذائى الصحى ، لكن الحل هو إنك تقعدى مع نفسك وتحاولى تكتشفى الأخطاء إللى بتعمليها و إللى بتخليكى مش بتخسى و العادات إللى محتاجة تكتسبيها ، و احنا هنحاول نساعدك بأننا نكشف ليكى أهم 10 أخطاء بتخلى الناس مش بتخس

  • ممارسة نفس التمارين الرياضية بدون تغيير :

لو بتمارسى نفس التمارين فى كل مرة بتروحى فيها الجيم أو مش بتغيرى فى روتينك اليومى فى ممارسة الرياضة ، مع الوقت جسمك هيتعود على نفس النوعية من التمارين ومش هتلاحظى أى تغييرات إيجابية فى جسمك  ، و الحل إنك تحاولى تغيرى فى الأنشطة إللى بتمارسيها أو تغيرى الأجهزة إللى بتلعبى عليها أو حتى تغيرى صالة الجيم كل فترة عشان تخلى جسمك كله يتحرك وتنشطى الدورة الدموية فى جسمك و دة هيساعدك على إنك تخسى أسرع

  • مش بتاخدى بالك من أكلك :

مش معنى إنك بتمارسى تمارين مجهدة و شاقة إنك لما ترجعى البيت أو و إنتى فى الشغل تاكلى كل إللى نفسك فيه ، يعنى مينفعش بعد ما ترجعى من الجيم تاكلى بيتزا أو مكرونة أو كيك بكدة هتكون المحصلة صفر، ممارسة الرياضة مش معناه تصريح بتناول كل الأكلات غير الصحية ، عشان تحسى بنتيجة لازم تخلى بالك من كل حاجة صغيرة بتاكليها خلال اليوم بما فى ذلك بواقى الأكل بتاعة أطفالك أو الأكل إللى بتدوقيه و إنتى بتشتغلى فى المطبخ ، كمان إنتى محتاجة تغيرى فكرة إن الأكل الصحى دايما طعمه مش حلو ، لكن على العكس فى كتير من وصفات الأكل الصحية المحتوية على نسب معتدلة من السعرات الحرارية والكربوهيدرات وبتمد جسمك بالعناصر الغذائية إللى هو محتاجها ، كل إللى إنتى محتاجاه هو هو إنك تقضى وقت إنك تدورى و تجربى  أكلات وسناكس صحية تكون مكوناتها و طعمها مألوف بالنسبة لك

  • بتعرضى نفسك للضغط والقلق النفسى :

على عكس الشائع إن الضغط النفسى ممكن يخليكى تخسى لكن دة مش هيحصل لو كنتى مهتمة إنك تخسى ، لكن على العكس مشاكلك النفسية هيكون ليها تأثير سلبى على هدفك فى إنك تخسى ويكون وزنك مناسب ، لو كنتى من الناس لو بيحسوا بالتوتر و القلق من كل حاجة جسمك هيتفاعل مع دة بطريقة سلبية  ، جسمك هيفرز هرمون إسمه كورتيزول هو المسئول عن تنظيم التحكم فى أثر الضغوط على الجسم ، إفراز هرمون الكورتيزول بنسبة كبيرة هيسبب حدوث ضعف فى نسيج العضلات و عدم توازن فى مستويات السكر فى الجسم و زيادة فى نسبة  الدهون فى الجسم

  • عدم أخذ فترة نوم كافية :

متفتكريش إنك لو نمتى وقت قليل و زودتى نشاطك باقى اليوم إنك هتخسى أسرع ، عدم أخذ فترة نوم كافية هيؤدى لنفس نتيجة التعرض للقلق والضغط النفسى و هيزود من إفراز هرمون الكورتيزول و دة ممكن يسبب نفس المشاكل السابقة ، خصصى لنفسك 7 ساعات من النوم العميق والمتواصل على الأقل يوميا ، وفرى بيئة مناسبة زى إنك تطفى أى إضاءة حواليكى و تسمعى موسيقى هادية

  • مش كل المنتجات الدايت إلموجودة فى السوبر ماركت هى منتجات صحية وتنفع للدايت فعلا :

و إنتى فى السوبر ماركت هتلاقى منتجات كتير قوى مكتوب عليها إنها صحية ومن مصادر طبيعية ودة ممكن يخليكى تتشتتى أى منتج فيهم أفضل ، لكن للأسف كتير من المنتجات إللى بيكون مكتوب عليها إنها قليلة السعرات الحرارية أو قليلة الدسم أو غيرها من المصطلحات المتعلقة بالنظام الغذائى الصحى مش بتكون صحية فعلا ، عشان تقدرى تعرفى إذا كان المنتج صحى أو لأ اقرى المكونات و الإضافات المكتوبة ، لو كان المنتج بيحتوى على قائمة طويلة من المكونات و الإضافات يبقى يفضل إنك تدورى على منتج تانى لأن المنتج الطبيعى هيكون قليل الإضافات

   . مش بتشربى كمية كافية من المياه :

شرب المياه بكميات كافية على مدار اليوم عادة متقلش أهمية أبدا عن الاهتمام باتباع نظام غذائى صحى ، شرب المياه هيساعد على زيادة كفاءة حركة الجهاز الهضمى و التخلص من السموم فى الجسم ، كمان هيساعدك على التحكم فى الشعور بالجوع

  • مش بتاخدى وقت للراحة :

صدقى أو لأ ، جسمك محتاج يرتاح من التمارين يوم فى الأسبوع على الأقل ، جسمك محتاج وقت عشان يرتاح و يجدد نشاطه ، و الطريقة الوحيدة للحصول على الراحة إللى جسمك محتاجها هى إنك ترتاحى من ممارسة كل الأنشطة البدنية لمدة يوم واحد على الأقل

فى المرة الجاية لما تحسى إنك مش بتخسى أو مش لاقية نتيجة من النظام إللى إنتى ماشية عليه ممكن ترجعى وتقرى المقالة دى ، لأنك فى الأغلب هتكونى بتعملى خطأ أو أكتر من الأخطار المذكورة فى المقال

 

Share.

Comments are closed.